amanatpartiasy.kz
Respýblıkalyq aıtystyń ashylý saltanatynda sóz alǵan Májilis Spıkeri, «Amanat» partııasynyń Tóraǵasy Erlan Qoshanov Memleket basshysy Qasym-Jomart Toqaevtyń eńbek adamynyń mártebesin kóterýdi tapsyryp, Respýblıka kúni qarsańynda Prezıdent 700-den astam qarapaıym eńbek adamyn memlekettik nagradamen marapattaǵanyn atap ótti. Bul – adal da tabandy eńbegimen Táýelsizdigimizdiń tuǵyryn bekemdep kele jatqan azamattarymyzǵa degen qurmet ekenin aıtty.
«Bıylǵy «Altyn dombyra» aqyndar aıtysynyń ózindik máni bar. Búgingi aıtys qarapaıym eńbek adamdaryna arnalady. «Eńbek – el yrysy» dep otyrmyz. Sebebi, berekeniń bastaýy – eńbekte. Al, onyń ıesi de, kıesi de – qarapaıym eńbek adamdary. Osy rette Memleket basshysy «Adal azamat» uǵymyn qoǵam sanasyna sińirýdi usyndy. Aınalyp kelgende, memleketti memleket, eldi el qylyp otyrǵan baı-baǵlandar emes, qatardaǵy jumysshylar, malshylar, dıqandar, ustazdar men dárigerler. Qazir olarǵa degen qoǵamnyń shynaıy qurmeti oıanyp keledi», dedi E.Qoshanov.
«Altyn dombyra» respýblıkalyq aıtysty júrgizý tizginin ustaǵan Májilis depýtaty Amanjol Áltaı kórermenge aqyndar men olardyń ónerin baǵalaıtyn qazylardyń quramyn tanystyrdy.
«Aıtys – urpaqtan urpaqqa ákeniń qany, ananyń sútimen jetken qasterli óner. Búgin elorda tórinde eńbek adamynyń qadir-qasıetin, olardyń qoǵamdaǵy aıryqsha ornyn jyrǵa qosamyn dep oıy óreli, sózi súbeli aıtýly aqyndar bas qosyp otyr. Barshańyzǵa sáttilik tileımin», dedi A.Áltaı.
Ár aımaqtan kelgen 16 aqynnyń arasynan kimniń baǵy janatyny erteń belgili bolady.
