Alamannyń alǵashqy kúni mádenı keshke arnaıy qatysqan Májilis spıkeri Erlan Qoshanov Memleket basshysy Qasym-Jomart Toqaevtyń eńbek adamynyń mártebesin kóterýdi únemi aıtyp júrgenine erekshe nazar aýdaryp, Respýblıka kúni qarsańynda 700-den astam qarapaıym eńbekkerdi memlekettik nagradamen marapattaǵanyn atap ótti. Bul adal da tabandy jumysymen Táýelsizdigimizdiń tuǵyryn bekemdep kele jatqan azamattarymyzǵa degen qurmet ekenin atap ótti.
«Bıylǵy «Altyn dombyra» aqyndar aıtysynyń ózindik máni bar. Onda eńbek adamdarynyń ónegesi ózek boldy. Sebebi bereke men molshylyqtyń bastaýy – eńbekte. Al onyń ıesi de, kıesi de – qarapaıym eńbek adamdary. Osy rette Memleket basshysy «Adal azamat» uǵymyn qoǵam sanasyna sińirýdi usyndy. Aınalyp kelgende, memleketti memleket, eldi el qylyp otyrǵan baı-baǵlandar emes, qatardaǵy jumysshylar, malshylar, dıqandar, ustazdar men dárigerler. Qazir olarǵa degen qoǵamnyń shynaıy qurmeti aıryqsha», dedi E.Qoshanov.
Aıtys tizginin ustaǵan belgili aqyn, Májilis depýtaty Amanjol Áltaı kópshilik kórermenge qazylar alqasynyń quramyn jáne aqyndar qaýymyn tanystyra kele: «Aıtys – urpaqtan-urpaqqa ákeniń qany, ananyń sútimen jetken qasterli óner. Búgin elorda tórinde eńbek adamynyń qadir-qasıetin, olardyń qoǵamdaǵy aıryqsha ornyn jyrǵa qosamyn dep oıy óreli, sózi súbeli aıtýly aqyndar bas qosyp otyr. Barshańyzǵa sáttilik tileımin», dedi.
Eki kúnge sozylǵan alaman aıtysta elimizdiń túkpir-túkpirinen jınalǵan 16 aqyn óner kórsetip, kil júırikte kim júırik ekenin anyqtady. Jarys sońynda dástúrli dodanyń máni men mańyzyna toqtalǵan «Amanat» partııasynyń atqarýshy hatshysy Dáýlet Káribek partııa tarapynan aldaǵy ýaqytta da mádenıet pen ónerge barynsha qoldaý kórsetile beretinin jetkizdi. «Memleket basshysy Qasym-Jomart Toqaev eńbek adamynyń mártebesin kóterýdi únemi aıtyp keledi. Esildiń jaǵasynda eki kún boıy erekshe óner kórsetken aqyndarymyz eńbek adamynyń abyroıyn asqaqtatyp, olardyń el damýyna qosyp jatqan ólsheýsiz úlesin jyrǵa qosty. Eldi kórkeıtetin – eńbek. Aıtys dep atalatyn asyl ónerimiz tórden túspesin», dedi ol.
О́z kezeginde Mádenıet jáne aqparat vıse-mınıstri Arman Júdebaev jyr dodasyn tamashalaýǵa kelgen qalyń kórermen men aqyndar qaýymyna shynaıy alǵysyn bildirdi. «Qazaq halqy ejelden aıtys ónerin joǵary baǵalaǵan. El ishindegi jaqsylyqty da, kemshilikti de sóz arqyly sheber jetkizip otyrǵan. Mine eki kúnge sozylǵan alaman aıtysta bizdiń arqaly aqyndarymyz da óz sheberlikterin ortaǵa salyp, eńbek adamynyń mártebesin asyryp, mereıin ústem etti. Olardy qoldap, qostap kelip otyrǵan barsha aıtyssúıer aǵaıynǵa rahmet aıtamyn», dedi vıse-mınıstr.
«Úndemesem ózime ózim tóre, sóılep ketsem ózime sózim tóre», deıdi qazaq halqy. Sol sózge búgin ádil baǵasyn bergen qazylar alqasynyń ary taza degen oıdamyn. Kúmis kómeıinen jaquttaı jyr tókken aqyndarymyzǵa shalqar shabyt tileımin. Ulttyq ónerimizdiń bedeli bıik, abyroıy asqaq bolǵaı», degen qazylar alqasynyń tóraǵasy, Qazaqstannyń halyq aqyny Ásııa Berkenova aqyndardyń ónerin baǵalaýda ádepten ozbaı, ardan attamaı ádil sheshim bolǵanyn atap ótti.
Osylaısha qazylar alqasynyń sheshimimen jarystyń bas júldesin qaraǵandylyq aqyn Maqsat Ahanov ıelenip, oǵan «Altyn dombyra» men avtokólik tabystaldy. Al júldeli 1-oryn jáne «Aıtys aqtańgeri» ataǵy qyzylordalyq Meıirbek Sultanhanǵa, 2-oryn pavlodarlyq Aspanbek Shuǵataıǵa buıyrdy. 3-oryndy ulytaýlyq Tólegen Jamanov pen Batys Qazaqstan oblysynan kelgen Jansaıa Mýsına ózara bólisti.
Sondaı-aq, jambyldyq Alına Aıdaraly, Batys Qazaqstan oblysynyń aıtyskeri Muradym Meırlanov jáne almatylyq Shuǵaıyp Sezimhan arnaıy júlde ıelendi. Saıysqa túsken barsha aqynǵa qomaqty syı-sııapat tabystaldy.
