Qazir bul zań jobasy Májiliste qabyldanyp, Senatta qaralyp jatyr. Eger Parlament zań jobasyn maquldap, Prezıdent Qasym-Jomart Toqaev qol qoısa, 2024 jyldan bastap kelesi kórsetkishter belgilenedi.
Eń tómengi jalaqy 85 myń teńge bolady, ıaǵnı 15 myń teńgege ósedi. Bul jumys berýshiler jumysshylarǵa eń tómengi jalaqydan tómen emes deńgeıde jalaqy berýge mindetti degendi bildiredi.
Memlekettik bazalyq zeınetaqy tóleminiń eń tómengi mólsheri – 28 215 teńgeni quraıtyn bolady (ósim 3 874 teńge).
Birlesken zeınetaqynyń eń tómengi mólsheri – 57 853 teńge (4777 teńgege ósý).
Aılyq eseptik kórsetkish 3692 teńge, ıaǵnı 242 teńgege ósedi.
Bul elimizde zeınetaqy, járdemaqy, áleýmettik tólemder mólsheri ósedi degen sóz. Sonymen qatar aıyppuldar, salyqtar jáne basqa da tólemder, sondaı-aq birlesken qyzmet týraly kelisimder boıynsha esep aıyrysýlar da ósedi.
Máselen, bala týylǵanda beriletin járdemaqy mólsheri (1,2 jáne 3 bala úshin) – 38 AEK. 2023 jyly 131 100 teńge bolsa, 2024 jyldyń 1 qańtarynan bastap 140 296 teńge bolady. Tórtinshi jáne odan da kóp balaǵa – 63 AEK. 2023 jyly 217 350 teńge bolsa, 2024 jyldyń 1 qańtarynan bastap 232 596 teńge bolady.
Kóliktiń jyldamdyǵyn saǵatyna 10-20 shaqyrymǵa asyrǵany úshin aıyppul 5 AEK quraıdy. 2023 jyly 17 250 teńge bolsa, kelesi jyly 18 460 teńge bolady.
Bazalyq áleýmettik tólemderdiń mólsherin esepteý úshin ómir súrý mınımýmy 43 407 teńgeni (ósim 2 840 teńge) quraıdy. О́mir súrý quny memlekettik áleýmettik járdemaqylardyń mólsherine de áser etedi.
Sondaı-aq 2024 jylǵa arnalǵan respýblıkalyq bıýdjette Úkimet munaı baǵasyn bir barrel úshin 80 dollar, al dollar qunyn 460 teńge dep belgilegenin atap ótemiz.
