«7 jyl ishinde biz jalpy ishki ónimdi eki esege arttyryp, onyń kólemin 2029 jylǵa qaraı 450 mıllıard AQSh dollaryna deıin jetkizý mindeti tur. Bul – ekonomıkalyq ósim tek munaı óndirýdi ulǵaıtý nemese qurylys jobalaryna ǵana emes, tehnologııaǵa, jumysshylardyń joǵary biliktiligine, damyǵan ǵylym men ınnovasııaǵa ıek artýy kerek degen sóz», dedi Palata tóraǵasy.
Osy oraıda Májilis bıznes júrgizý máseleleri boıynsha zań jobasyn birinshi oqylymda qabyldady. Onda kásipkerler úshin jumys isteýge kedergi keltiretin jáne retteýde yqtımal burmalanýlarǵa, monopolııalaý táýekelderi men sybaılas jemqorlyqqa soqtyrýy múmkin artyq shekteýler alynyp tastaldy.
Sonymen qatar depýtattar jer qoınaýyna, kásiporyndar men jumysshylarǵa jaýapkershilikpen qaraýdy arttyrý úshin iri ónerkásip ıelerine qoıylatyn talapty kúsheıtýge nıetti.
Spıkerdiń pikirinshe, óz mindettemelerin jaýapkershilikpen oryndaıtyn, baza men tehnologııalardy damytatyn, óz qyzmetkerlerine jáne olar jumys isteıtin óńirge ınvestısııa salatyn kásipkerlerge basymdyq berilýge tıis.
«Prezıdenttiń saılaýaldy baǵdarlamasyn oryndaý úshin Parlament jýyrda jańa Salyq kodeksiniń jobasyn jumysqa qabyldaıdy. Ol ekonomıkany kóleńkeden shyǵarýǵa, salyq salýdyń ádil júıesin qurýǵa, ekonomıkaǵa qajet emes artyqshylyqtar men erekshelikterdi alyp tastaýǵa baǵyttalǵan», dep atap ótti Spıker.
Tolyǵyraq «Kazahstanskaıa pravda» gazetinen jáne kazpravda.kz. saıtynan oqýǵa bolady.
