Senat tóraǵasynyń orynbasary Jaqyp Asanov Memleket basshysy óz Joldaýynda elimizdegi agrarlyq salanyń ózekti máselelerine erekshe nazar aýdarǵanyn atap ótti.
«Qazaqstandaǵy agrarlyq sala qýatty bolýy kerek, ǵylymǵa jáne joǵary bilikti mamandardy daıarlaýǵa erekshe nazar aýdarylýǵa tıis. О́kinishke oraı, sharýalarǵa kerektiniń kóbisin shetelden alamyz. Bıdaı tuqymyn, mıneraldy tyńaıtqyshtardy, tehnıkany syrttan tasımyz. Jerdiń qunarlyǵyn jaqsartatyn ǵylymı negizderdi de engize almaı júrmiz. Keıbir tehnıka men tehnologııany basqa elden alyp kelýge biz qarsy emespiz. Múmkin, ol tıimdi bolar. Biraq jerdiń qunarlyǵyn arttyrý, sebetin tuqym men organıkalyq tyńaıtqyshtardy óndirý, óz jaǵdaıymyzǵa beıimdelgen sharýashylyqty damytý, onyń ónimdiligin kóbeıtý, álemge ulttyq ónimderdi shyǵarý – tek ózimizdiń mindetimiz, ǵylymnyń mindeti», dedi J.Asanov.
Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń tóraǵasy Álı Bektaev otyrys barysynda elimizdegi agrarlyq sala áli de zor shyǵyndardy talap etetinin jetkizdi.
«Elimizdiń agroónerkásip keshenin damytyp, azyq-túlik qaýipsizdigin qamtamasyz etýde – óndiristi ǵylymmen ushtastyrý, ǵylymdy jańa deńgeıge kóterý arqyly jańa tehnologııalardy engizý, sondaı-aq osy salada eńbek etetin bilikti mamandardy daıarlaý mańyzdy ról atqaratyny bárimizge belgili. Memleket basshysy bıylǵy Joldaýda qazirgi aýyl sharýashylyǵy joǵary tehnologııaly sala bolýǵa tıis, ony jer jaǵdaıy nemese aýa raıy emes, ınnovasııalyq amal-tásilder tabysqa jetkizedi degen bolatyn», dedi Á.Bektaev.
Úkimet saǵaty otyrysyna Senat depýtattary, aýyl sharýashylyǵy mınıstri Aıdarbek Saparov, ǵylym jáne joǵary bilim mınıstri Saıasat Nurbek, agrarlyq saladaǵy joǵary oqý oryndary men ǵylymı-zertteý ınstıtýttarynyń basshylary, táýelsiz sarapshylar jáne basqalar qatysty.
Senator Á.Bektaev Úkimet saǵatynyń jumysyn qorytyndylaı kelip, basqosýda talqylanǵan máseleler men olardyń sheshimderi jáne usynystar pysyqtalatynyn, odan keıin Úkimet atyna jiberiletin usynymdarǵa engiziletinin atap ótti.
