Oblys ákimdigi Jumyspen qamtýdy úılestirý jáne áleýmettik baǵdarlamalar basqarmasynyń basshysy Gúldana Jaýynbekovanyń aıtýynsha, óńirde múgedektigi bar 45 601 azamat tirkelgen. Bul kórsetkish oblys halqynyń 3,7 paıyzyn quraıdy.
«Osy jyly múgedektigi bar adamdardyń jeke abılıtasııalaý jáne ońaltý baǵdarlamalaryna bıýdjetten 3,4 mlrd teńge qarjy bólingen. Bul qarjynyń jartysy respýblıkalyq bıýdjetten qarastyrylsa, qalǵany jergilikti bıýdjetten berildi. Al ótken jyly 1,9 mlrd teńge bólingen edi. Keıingi 10 aıda áleýmettik qyzmetter usyný portalynda múmkindigi shekteýli azamattardyń jeke ońaltý baǵdarlamalarynyń oryndalýy 93 paıyzdy qurady. Bul kórsetkish boıynsha óńirler arasynda kósh bastap turmyz. Iаǵnı portalǵa tirkelgen azamattardyń 24 719 ótinishiniń, 22 967-si qanaǵattandyryldy. Jalpy alǵanda, óńirimiz boıynsha 45 601 múgedektigi bar adam tirkelgen bolsa, onyń 6 824-i – balalar. О́kinishke qaraı, bul sanattaǵy balalardyń sany jyldan-jylǵa artyp bara jatyr. Olardyń 2 myńǵa jýyǵy tirek-qımyl apparattary buzylǵan jáne júıke aýytqýlary bar balalardyń sanatyna qosylyp otyr. О́tken jyly basqarmaǵa qarasty 12 medısınalyq-áleýmettik mekemelerde 1 291 adamǵa arnaýly áleýmettik qyzmetter kórsetildi», deıdi basqarma basshysy.
G.Jaýynbekova keltirgen derekke júginsek, 3 stasıonar jaǵdaıyndaǵy arnaýly áleýmettik qyzmetter usyný ortalyǵynda múgedektigi bar 755 adamǵa, 9 jartylaı stasıonar jaǵdaıynda múgedektigi bar adamdardy jáne balalardy ońaltý jáne beıimdeý ortalyqtarynda 536 azamatqa qyzmetter usynylǵan.
«Memleketimizdiń qoldaýynyń nátıjesinde keıingi jyldary arnaýly áleýmettik qyzmetterdiń kólemi men sapasyn jaqsartý maqsatynda qyzmetterdi usynatyn mekemelerdiń jelisin damytý jumystaryna aıryqsha den qoıylǵan. Osy jyly Sarysý aýdanynda syıymdylyǵy 25 oryndyq múgedektigi bar balalardy ońaltý jáne beıimdeý ortalyǵy ashylsa, buǵan deıin habarlaǵanymyzdaı, Taraz qalasynda 150 oryndyq ońaltý jáne beıimdeý ortalyǵynyń qurylysy júrgizilip, paıdalanýǵa berildi. Qazirgi tańda ońaltý ortalyǵynda 110 azamat qyzmet alyp jatyr. Ǵımarattyń basty ereksheligi sol, barlyq jańa tehnologııalar engizilgen, zamanaýı talaptarǵa saı túrli jabdyqtarmen qamtamasyz etilgen. Basseın, arnaıy vannalar, sport zal, mádenı is-sharalar ótetin májilis zaly bar», deıdi G.Jaýynbekova.
Onyń aıtýynsha, jeltoqsan aıynda Taraz qalasynda 110 oryndyq aýtızmi bar balalardy qoldaý ortalyǵy ashylmaq. Qazirgi kezde ǵımarat tolyqtaı jóndeýden ótkizilgen. «Qamqorlyq» qorynyń qoldaýymen qajetti jabdyqtar tolyqtaı satyp alynǵan.
«Jańadan ashylatyn ǵımarattyń qoǵamǵa paıdasy zor. Bul ortalyq aýtızmi jáne basqa da psıhıkalyq aýytqýy bar balalardyń áleýmettik problemalaryn sheshýge jaǵdaı qalyptastyrady. Sondaı-aq olardyń basqa azamattarmen teń dárejede qoǵam ómirine qatysýyna múmkindikter qarastyrýǵa baǵyttalǵan qyzmetter keshenin usynady. Bir sózben aıtqanda, erekshe balalardyń máselelerin sheshý jolynda ortalyqtyń qyzmetkerleri aıanbaı eńbektenýge ázir. Taraz qalasy men aýdan ákimdikteriniń jumyspen qamtý jáne áleýmettik baǵdarlamalar bólimderiniń uıymdastyrýymen 14 bólimshe jáne 1 bólimsheden tys qyzmet qarastyrylǵan. Qazirgi kezde úıde qyzmet kórsetý jaǵdaıynda 711 múgedektigi bar azamatqa jáne balalarǵa arnaýly áleýmettik qyzmetter usynylyp jatyr», deıdi G.Jaýynbekova.
О́ńirde múgedektigi bar azamattardy áleýmettik turǵydan qorǵaý jumystaryna úkimettik emes uıymdar da aıryqsha atsalysyp júr. Olar memlekettik áleýmettik tapsyrys aıasynda túrli qyzmetter uıymdastyryp jatyr.
«Bul azamattardyń tabys tabýyna teń múmkindik qarastyrǵan abzal dep esepteımiz. О́ıtkeni olardyń da eńbek etýge tolyqtaı quqyǵy bar. Qazirgi kezde olardy jumyspen qamtý baǵytynda birqatar jumys atqarylyp jatqanyn aıta ketken jón. Máselen, ákimderdiń qaýlylaryna sáıkes osy jylǵa 51 mekemede 86 orynǵa kvota aıasynda jumys oryndary belgilenip, búginde 68 múgedektigi bar azamat jumysqa ornalasty. Sondaı-aq 3 024 múgedektigi bar azamat jumyspen qamtýdyń belsendi sharalaryna tartyldy. Olardyń 726-sy turaqty jumyspen qamtylsa, 508-i aqyly qoǵamdyq jumysqa, 18-i áleýmettik jumys oryndaryna, 45 azamat jastar tájirıbesi boıynsha jumysqa joldandy. Bul kórsetkish, árıne, kóńil kónshitedi. Múgedektigi bar azamattardy jumyspen qamtýda «Alǵashqy jumys orny» jobasynyń da paıdasy tıgenin atap ótken jón. Búginde 15 azamat atalǵan jobanyń sharapatyn kórse, 43 azamat «Kúmis jas» jobasyna qatysyp otyr. Jalpy alǵanda, múgedektigi bar azamattardyń ózin-ózi damytýyna da aıryqsha nazar aýdaryp otyrǵanymyzdy aıta ketken lázim. Máselen, qazirgi kezge deıin onlaın oqytý kýrstaryna 77 azamat joldanyp, «Bastaý bıznes» kásipkerlik negizderi arqyly 1 270 azamat oqýdan ótse, kásiptik oqytý kýrstaryna 53 azamat joldandy. 269 azamat jeke kásibin ashýǵa grant aldy», deıdi G.Jaýynbekova.
Basqarma basshysy keltirgen derekterden uqqanymyz, múgedek azamattarǵa jergilikti atqarýshy bılik tarapynan aıtarlyqtaı qoldaý kórsetilip jatyr. Bul baǵyttaǵy izdenister aldaǵy jyly da laıyqty jalǵasyn tappaq.
Jambyl oblysy
