Foto: polisia.kz
88 jastaǵy Kókshetaý qalasynyń turǵynyna qońyraý shalǵan adam ózin polısııa qyzmetkeri retinde tanystyryp, nemere kelini shóberesimen birge kólik apatyna túskenin, medısınalyq kómek kórsetý úshin 5 mıllıon teńge qajet ekenin aıtady. Zeınetker mundaı qarajaty bolmaı turǵanyn jetkizgende, týystarynan qaryz suraýǵa úgitteıdi. Kúdiktiniń sybaılasy qosa habarlasyp, kelini men shóberesiniń jaǵdaıy tym aýyr ekenin aıtyp, zeınetkerdiń úreıin odan beter ushyra túsedi. Zeınetker ózinde bar 2 mıllıon teńgesin usynady. Dropper kelip aqshany alǵan soń kúdikti kórsetken esepshotqa 1 mıllıon 800 myń teńgeni aýdaryp, óziniń «eńbekaqysy» úshin 200 myń teńgeni alyp qalǵan.
«Polıseıler QR QK-niń 190-baby 2-bóligi (Alaıaqtyq) boıynsha sotqa deıingi tergep-tekserýlerdiń biryńǵaı tizilimine tirkedi. Kúdiktilerdi ustaý maqsatynda Kókshetaý qalasynyń krımınaldyq polısııa qyzmetkerleri birqatar jedel-izdestirý is-sharalaryn ótkizdi, zeınetkerdiń turǵylyqty jerinde ornatylǵan jedel basqarý ortalyǵynyń beınekameralarynyń jazbalaryn qarady, taksı fırmalarynyń júrgizýshileri men úı turǵyndarynan jaýap aldy. 26 qarashada qabyldanǵan sharalardyń nátıjesinde dropperdiń jeke basy anyqtaldy, ol О́skemen qalasynyń 27 jastaǵy turǵyny bolyp shyqty. Áńgime barysynda er adam jetkizýshi jumysyn mobıldi qosymshadan tapqanyn aıtty, al sharttar oǵan óte qarapaıym bolyp kórindi: bir mekenjaıdan aqsha alyp, sodan keıin jaqyn jerdegi bankomat arqyly kórsetilgen shotqa aýdarý», delingen aqparatta.
Ustalǵan jetkizýshi-dropper bul áreketiniń zańdy-zańsyz ekenin suraǵanyn, kúdikti sharýanyń bári quqyq qorǵaý organdarymen birlesip júrgizilip jatqanyn aıtqandyqtan keliskenin jetkizdi. Tipti kúdikti dropperge «qart kisige vırýs juǵyp ketpeýi úshin» medısınalyq maska kıip barýdy mindettegen eken. Osy fakt boıynsha qajetti tergeý áreketteri júrgizilip jatyr.
