Foto: iba.sport
– Temirtas, jeńis qutty bolsyn. «Úlken pyshaq uıalǵannan ótedi» deımiz. Baıqaýymyzsha, bokstan ótken jazǵy Spartakıada oıyndaryna qatysqan sportshylardyń ishindegi jasy úlkeni óziń ǵana.
– Durys aıtasyz, qatysýshy boksshylardyń jasy ózimnen áldeqaıda kishi. Tipti 16-17 jas kishi talanttar da qatysty. Olardyń fızıkalyq qýaty, sheberligi ósip kele jatqany qýantady. Tájirıbemizdiń tolysyp, talaı dodaǵa qosylǵanymyzdyń nátıjesinde jeńis maǵan buıyrdy. Fınaldyq jekpe-jekte astanalyq Ashat Júsipovten basym boldym. Ekeýmiz buǵan deıin de birneshe márte jekpe-jekte aıqastyq. Onyń judyryqtasý stılin jaqsy bilemin, ol da meni zerttep alǵany aıqyn baıqaldy. Bapkerlerimniń baǵyttaýy boıynsha qatelikke urynbaı aıqastym.
– О́zińniń enshińde Azııa chempıonatynyń altyny, álem chempıony syndy aıtýly ataq, dáreje bar. Ulttyq qurama sapynda 15 jyldan beri júrsiń ǵoı. Biraq jazǵy Spartakıadanyń altyny osy kúnge deıin buıyrmaǵan eken.
– 2011 jyly jartylaı fınalda súrinip, jazǵy Spartakıadanyń qola medalin mise tutqan edim. 2015 jyly «Astana arlandary» kásipqoı klýbynyń sapynda jekpe-jekke túskendikten, jazǵy Spartakıadaǵa qatyspadym. 2019 jyly Azııa chempıonatynda qola medal alǵandyqtan, jazǵy Spartakıada oıyndaryna qosylmaı demalys aldym. О́zińiz aıtpaqshy, ulttyq quramada 15 jyl júrip, tórt jylda bir aınalyp soǵatyn jazǵy alamannyń altyn medali osy joly buıyrdy.
– Endi jetpeı turǵany – Olımpıada medali. Biraq kelesi jyly Parıjde ótetin jazǵy Olımpıada oıyndarynda boksshylar 7 salmaqta qatysady. Sen 48 kelide synǵa túsip júrsiń. Parıjdegi dodada eń jeńil salmaq 51 keli. Endi josparyń qandaı, olımpıadalyq salmaqqa ótesiń be? Álem chempıony Sanjar Táshkenbaı da aýysty emes pe?
– Meniń de armanym jazǵy Olımpıada oıyndarynan oljaly oralý. Biraq buǵan deıin 51 kelige ótip kórdim, ózimniń salmaǵym emes eken. Boıymnyń tapaldyǵy, qolymnyń qysqalyǵy birden baıqaldy, kúshim de jetpeıtinin ańǵardym. Sanjar – jalyndap turǵan, jastar arasynan eresekter qataryna endi ótken boksshy. Dene turqy da maǵan qaraǵanda sıdam, qoly uzyn. Fızıkalyq áleýetin kúsheıtse, 51 kelige qalyptasyp alady dep oılaımyn.
2009 jyldan beri ulttyq quramanyń beldi boksshylarynyń biri sanalyp kelemin. Jazǵy Olımpıada oıyndarynda ózimniń áleýetimdi synap ta kórgim keledi. Biraq buıyrtpasa beker ǵoı. Kim biledi, 2028 jyly ótetin jazǵy Olımpıada oıyndarynda boksshylardyń salmaǵy 48 keliden bastalýy múmkin. Dám tartsa, jolymyz túser, úmit úzbeımin. Áskerıler arasynda álem chempıony atandym, 2021 jyly áýesqoılar dýynda da álem chempıonatynyń altyn medali buıyrdy. Endigi maqsatym – alda bolatyn álem birinshiligine, basqa da qurlyqtyq, halyqaralyq týrnırlerge qatysý úshin ázirlikti kúsheıtý. 51 kelige aýysatyn jospar joq. Qazaq boksynyń tarıhynda eki dúrkin álem chempıony atanǵan ázirge Serik Sápıev qana. Sol mejege jetý jolynda barymdy salamyn. 2025 jyly Japonııanyń Osaka qalasynda qurylatyn rıngte álem chempıonatynyń altyn medalin oljalaý – basty maqsatym.
