Bul joly Kúnshyǵys elindegi jarysta Qazaqstannyń 20 sportshysy baq synady. Alǵashqy kúni alty salmaq dárejesiniń júldeleri sarapqa salyndy. О́kinishke qaraı, birde-bir balýanymyz jeńis tuǵyryna kóterile almady. Erler arasynda 73 kg salmaqta beldesken Danııar Shamshaev tusaýkeser kezdesýinde polshalyq Adam Stodolskıge san soqtyrǵanymen, kelesi kezeńde álem chempıonatynyń eki dúrkin kúmis júldegeri, Eýropa chempıony, ıtalııalyq Manýel Lombardodan aılasyn asyra almady. Asqar Narqulov jastar arasyndaǵy álem birinshiliginiń kúmis júldegeri, grýzııalyq Georgıı Terashvılıge ese jiberdi. 81 kg salmaqtaǵy Abylaıhan Jubanazar men Rýslan Musaevtyń da joly bolmady. Abylaıhan qyrǵyzstandyq Asad Masabırovtan utylsa, Rýslan Panamerıka oıyndarynyń jeńimpazy, kanadalyq Fransýa Gote-Drapodan jeńildi. 90 kg salmaqta kúresken Aıdar Arapov pen Ermahan Ánýarbekov jarys bastalǵan bette kórermender qataryna qosyldy. Olar shvesııalyq Markýs Nıman men marokkolyq Ashraf Moýtıdiń osal tusyn taba almady.
Áıelder básekesinde 77 kg salmaq dárejesinde baq synaǵan Olımpııa oıyndary, álem jáne Eýropa chempıonattarynyń júldegeri, reseılik Mádına Taımazova bizdiń Ekaterına Tokarevany ońbaı súrindirdi. Asa aýyr salmaqta óner kórsetken Nazgúl Maratova fransııalyq Koralı Haımege jarytyp qarsylyq kórsete alǵan joq. Al Kámıla Berliqash venesýelalyq Ýrdaneta Amaratadan aılasyn asyrǵanymen, kelesi kezeńde álem chempıonatynyń kúmis júldegeri, Eýropa chempıony, fransııalyq Lea Fontennen jeńildi. Jubanysh beldesýde ol japonııalyq Kodama Hıkarýge jol berdi.
Aldaǵy kúnderi Nurqanat Serikbaev pen Eldos Smetov (60 kg), Nurzat Sálimbaev pen Ǵusman Qyrǵyzbaev (66 kg), Nurlyhan Sharhan men Bekarys Sádýaqas (100 kg), Ǵalymjan Qyryqbaı pen Erasyl Qajybaev (+100 kg), Ǵalııa Tyńbaeva men Ábıba Ábýjaqynova (48 kg) jáne Esmıgúl Kýıýlova (70 kg) syndy balýandarymyz tatamıge shyǵady.
Esterińizge sala keteıik, Tokıodaǵy Grand Slam týrnırinde 84 memleketten kelgen 506 dzıýdoshy kúsh synasyp jatyr. Bul jarystyń júlde qory 154 myń dollardy quraıdy. Tarqatyp aıtsaq, bas júldeni oljalaǵandar 4 myń (+1 000 bapkerine), kúmis alǵandar 2 400 (+600 bapkerine) jáne qola medaldi ıelengender 1 200 (+300 bapkerine) dollardy qaltaǵa basady.
