Buǵan deıin Almaty, Shymkent qalalary men Qyzylorda, Aqtóbe, Almaty jáne Jetisý oblystarynda qylmystyq shemalar ashylǵan bolatyn. Endi Túrkistan oblysy boıynsha Sybaılas jemqorlyqqa qarsy qyzmet Shardara jáne Saryaǵash aýdandarynyń bilim bólimderiniń býhgalterlerine qatysty sotqa deıingi tergeýdi bastaǵan. Olar bıýdjet qarajatyn asa iri kólemde júıeli negizde jymqyrdy degen kúdikke ilindi.
Tergeý málimetteri boıynsha kúdikti adamdar 2020-2023 jyldar aralyǵynda bilim berý salasynda jumys istemeıtin áldekimderdiń shottaryna jalaqy aýdarý jáne mektep qyzmetkerlerine tıisti mejeden joǵary jalaqy esepteý arqyly shamamen 2,6 mlrd teńge jymqyrǵan. Osy ister boıynsha qazirgi ýaqytta Túrkistan oblysynyń bilim berý salasynan 17 adam qylmystyq jaýapkershilikke tartylyp, olardyń 4-i qamaýǵa alyndy.
Zalaldy óteý maqsatynda 39 jyljymaıtyn múlik, 44 avtokólik, zergerlik buıymdar jáne qylmystyq ister boıynsha aıyptalýshylardyń aqshalaı qarajattary buǵattaldy.
Sonymen qatar tergeý barysynda Túrkistan oblysynyń Tekserý komıssııasynyń memlekettik aýdıtory áshkerelendi. Ol Saryaǵash aýdanyndaǵy mektepterdiń birinde aýdıt barysynda anyqtalǵan jymqyrý faktilerin paıdakúnemdik nıetpen jasyrǵan.
Buǵan qosa Jetisý oblysynda uıymdasqan qylmystyq toptyń quramynda eki jarym jyl ishinde 4,4 mlrd teńge jymqyrǵan qalalyq bilim bóliminiń qyzmetkerlerine qatysty sotqa deıingi tergeý aıaqtalǵanyn aıta keteıik. Qylmystyq topqa jalpy sany 13 adam kirgen. Qylmystyq-prosestik kodekstiń 201-babyna sáıkes ózge aqparat jarııa etýge jatpaıdy.
