Máýlen Áshimbaev qazirgi tańda kreatıvti ındýstrııa qarqyndy damyp kele jatqanyn jáne bul sala jahandyq ekonomıkanyń mańyzdy bóligine aınalǵanyn atap ótti. Sondyqtan Memleket basshysy Qasym-Jomart Toqaev qyrkúıek aıynda jarııalaǵan Joldaýynda elimizde osy sektordy damytýǵa qatysty basymdyqtarǵa nazar aýdardy. Palata tóraǵasynyń aıtýynsha, qolǵa alynǵan isti sapaly júzege asyrý úshin barlyq múddeli tarap birlesip, júıeli jumys júrgizýi qajet.
«Prezıdent Joldaýda Qazaqstanda kreatıvti ındýstrııany damytý jóninde naqty mindetter júktedi. Bul baǵytta memlekettik organdar quqyqtyq jaǵdaı qalyptastyryp, óńirlerde kreatıvti jobalardy damytyp, ónimderdi kommersııalandyrýǵa kómek kórsetip, keshendi jumys júrgizýge tıis. Búginde elimizdiń zańnamasyna engizý úshin birqatar ózgeris ázirlenip jatyr. Jalpy, qazir salany odan ári tıimdi damytýǵa qajetti negiz qalyptasyp keledi. Osy jumys aıasynda depýtattar, memlekettik ınstıtýttar, kreatıvti ındýstrııa ókilderi jáne sarapshylar arasynda nátıjeli dıalog qalyptastyrý asa mańyzdy», dedi Palata tóraǵasy.
Talqylaý barysynda M.Áshimbaev otandyq kreatıvti ındýstrııanyń damý áleýeti aıtarlyqtaı joǵary ekenine nazar aýdardy. Ol, eń aldymen, azamattardyń shyǵarmashylyq jáne zııatkerlik kapıtalyna negizdelgen. Sondaı-aq ınklıýzıvti ekonomıkanyń damý kózi retinde jumys istep keledi. Degenmen Qazaqstanda bul salanyń jalpy ishki ónimge qosqan úlesi búginde 1 paıyzǵa da jetpeıdi. Jumyspen qamtý baǵytyndaǵy úles te tómen.
«Búginde kreatıvti ındýstrııa salasynda júrgen azamattar úshin praktıkalyq qadamdar mańyzdy ekenin bilemiz. Sondyqtan biz qajetti zańnamalyq ózgerister qabyldamas buryn osy máselege toqtalyp, ózderińizben birge salany egjeı-tegjeı zerdelep alýdy jón kórdik. Qazir Parlamenttiń bir top depýtaty «Mádenıet týraly» jáne «Avtorlyq quqyq jáne sabaqtas quqyqtar týraly» zańdarǵa ózgerister men tolyqtyrýlar engizý máselesin pysyqtaýda. Osy oraıda senatorlar kreatıvti ındýstrııany damytý máselesi boıynsha birqatar kezdesý ótkizdi. Aldaǵy ýaqytta sonyń nátıjeleri boıynsha tıisti usynystar daıyndaıdy», degen M.Áshimbaev múddeli taraptardy Palatanyń zań shyǵarý jumysyna qatysýǵa shaqyrdy.
Kezdesý barysynda Mádenıet jáne aqparat mınıstri Aıda Balaeva kreatıvti ındýstrııa salasyn damytýǵa arnalǵan keshendi sharalar men startap-jobalar týraly aıtty. Ol bul baǵytta iri qalalardan óńirlerge qaraı oıysý basym mindetterdiń biri ekenin atap ótti. Mundaı qadam mamandardyń ár oblys ortalyǵynda nemese qalada jergilikti talanttarmen jumys istep, olardyń áleýetin ashýyna múmkindik beredi. Sonymen qatar zııatkerlik menshikti qosymsha qundy quraıtyn jabdyq nemese tehnologııa sııaqty múlik retinde qarastyrýdyń mańyzy zor.
Is-sharada Senat janyndaǵy Jas sarapshylar klýbynyń músheleri sóz alyp, jańa ekonomıkalyq úlgige kóshý jaǵdaıynda kreatıvti ındýstrııany damytýǵa qatysty óz usynystaryn aıtty. Olar negizinen medıa, kıno, mýzyka, dızaın, bilim berý, aqparattyq tehnologııalar jáne taǵy basqa salalar boıynsha ázirlenip jatqan jobalardy qamtıdy. Sondaı-aq qoldanystaǵy jobalar jóninde de sóz boldy. Bul tájirıbelerdi eskerýdiń jáne olardy naryqtyń qazirgi suranystaryna beıimdeýdiń mańyzy zor.
Klýb otyrysynda aqyn jáne mýzykant Maqpal Jumabaı, «Pygmalion» galereıasynyń kórkemdik dırektory Ánýar Músirepov, «QASh» fılminiń prodıýseri, «Qara Studios»-tiń bas prodıýseri Erkebulan Kúrishbaev, «JUZ Entertainment» leıbliniń prodıýseri Erbolat Bedelhan, zańger, kreatıvti prodıýser Nurdáýlet Bekjan, «Manýfaktýra ER» kompanııasynyń negizin qalaýshy Aleksandr Ermakov jáne «Kazakh Tourism» ulttyq kompanııasy kreatıvti týrızm departamentiniń basshysy Irına Harıtonova óz jumystary jáne salanyń damý perspektıvalary týraly sóz sóıledi.
