Dımash Qudaıbergenniń óneri men tanymaldyǵy Qazaqstanǵa mıllıondaǵan týrıst tartýǵa baǵyttalady. Aqtóbelikter ónerpazdyń týǵan jerine túrli saıahattar uıymdastyrýdy josparlap otyr. Jańa týrıstik baǵyt «Dimash Tour» dep atalady. Saıahat barysynda sheteldik qonaqtarǵa Dımashtyń týǵan ólkesi, oqyǵan mektebi, otyrǵan partasy, balalyq shaǵy ótken jerdi kórsetiledi. Sonymen qatar ánshiniń ónerin shyńdaǵan alǵashqy ustazdarymen kezdesýler ótkiziledi.
Uıymdastyrýshylar bul saıahatshylardy qyzyqtyratynyna senimdi. Qytaı týrıstik ındýstrııasynyń tájirıbeli mamandary osy baǵytta birlesip jumys istep, keleshekte damytýǵa nıet bildirip otyr. Olar bul bastamanyń perspektıvasy joǵary dep sanaıdy. Qytaı elinde aldaǵy birneshe kún boıy Aqtóbe oblysynyń týrıstik áleýeti tanystyrylady. Jobanyń bastamasy retinde Beıjińde Dımash Qudaıbergenniń vokal boıynsha alǵashqy ustazy Marat Áıtimovpen kezdesý ótkizilip, ónerpazdyń shyǵarmashylyǵy kórsetildi.
Budan bólek, ulttyq taǵamdar, ulttyq mýzyka men mádenı kórinister qoıylyp jatyr. Qolónershiler sheberlik sabaqtaryn ótkizip, biregeı kádesyı men buıymdaryn kópshiliktiń nazaryna usyndy. Sonymen qatar pantoterapııa boıynsha emdik sharalary tanystyryldy.
«Osy múmkindikti biz maksımaldy túrde paıdalana bilýimiz kerek. Ol úshin kóp jumys istelýi kerek. Ony bárimiz jaqsy túsinemiz. Aqtóbe óńirindegi jalpy ártúrli sharýamen, bıznespen aınalysatyn sonyń ókilderi kelip otyr. Qytaı eli osy baǵytty damytýǵa shyn kóńilmen kirisse, olardyń qolynan kóp nárse keledi. Biz ony bilemiz. Osy baǵytta kelip otyrmyz», deıdi Dımashtyń ustazy Marat Áıtimov.
Is-shara «Road Show-visit Aktobe 2023» degen ataýmen ótip jatyr. Oǵan Qytaı Halyq Respýblıkasy týrıstik ındýstrııasynyń ókilderi, qaýymdastyqtar, týrıstik agenttikter qatysyp jatyr.
«Bizdiń jalpy 19 lokasııamyz bar. Ol ekologııalyq týrızm. Bizdiń eń tanymal jerimiz - Baıǵanın aýdanyndaǵy eki jer. Kelesi jyly týrıstermen jumys isteımiz degen maqsatymyz bar. Byltyr Aqtóbe oblysyna 5-6 myń sheteldik azamat keldi. Kelýshiler sanyn 8-9 myńǵa deıin jetkizý josparymyzda bar. Sheteldik týrısterdi tartý kerek», deıdi «Vizit Aktobe» ortalyǵynyń dırektory Ersaıyn Súıinov.
Basty maqsat oblystyń týrıstik oryndaryn damytý. О́ńirde ónerkásiptik, ekologııalyq, medısınalyq jáne mádenı-tanymdyq baǵyttarǵa basymdyq berilip otyr. Ásirese tabıǵaty tumsa ólkelerge týr baǵyttar uıymdastyrylady. Onyń ishinde Aqtolaǵaı jáne Aqbota-Sáńkibaı borly taýlary, Aqqum qumdy alqaby, Barqyn qumdar, «Qasqyr» sarqyramasy, Aqqaıyń ormany bar. Aıta ketý kerek, 2024 jyl Qazaqstannyń Qytaıdaǵy týrızm jyly. Búgingi shara tikeleı osyǵan baǵyttalǵan. Aqtóbe óńiriniń týrıstik áleýetin tanystyrý sharalary 9 jeltoqsan Shanhaı qalasynda da uıymdastyrylady. Al 11 jeltoqsan Koreıada ótedi.
