Senat Tóraǵasy Máýlen Áshimbaev azamattyq qorǵaý júıesin jetildirý elimiz úshin strategııalyq mánge ıe ekenin jáne Palata bul máseleni erekshe baqylaýda ustap otyrǵanyn aıtty. Sondaı-aq ol sońǵy kezderi jıilep ketken tabıǵı jáne tehnogendik apattar tótenshe jaǵdaılarǵa qatysty zańnamalyq aktilerdi qaıta qaraý qajettigin kórsetip bergenin atap ótti.
«Qostanaı, Abaı oblystarynda bolǵan iri orman órtteri órtti sóndirýge jaýapty memlekettik organdardyń jumysyndaǵy túıtkilderdi jáne bul baǵytta tıimdi júıeniń joq ekenin aıqyn kórsetip berdi. Osyǵan baılanysty Memleket basshysy Qasym-Jomart Kemeluly Toqaev azamattyq qorǵaý júıesin jańǵyrtý jóninde naqty mindetter júktedi. Sondyqtan tıisti memlekettik organdar bul baǵytta aýqymdy jumys atqarýǵa tıis», dedi Máýlen Áshimbaev.
Palata Spıkeri tótenshe jaǵdaılarǵa qarsy is-qımyldy josparlaý jónindegi qyzmetti jetildirýdiń de mańyzdy ekenin tilge tıek etti. Bul rette jańa tásilderdi, onyń ishinde shet elderdiń ozyq tájirıbelerin engizý jáne ǵylymı áleýetti keńinen paıdalaný erekshe mánge ıe.
Sonymen qatar Máýlen Áshimbaev ónerkásiptik qaýipsizdik máselesinde de olqylyqtar az emes ekenin aıtty. Qaraǵandy oblysyndaǵy shahtalarda bolǵan apattar sonyń saldary ekeni sózsiz. Bul baǵytta aldyn alý jumystarynyń júzege asyrylmaýy, tıisti baqylaýdyń álsireýi, sapasyz nemese ýaqtyly júrgizilmegen kúrdeli jóndeý, júıesiz jobalyq jáne tehnıkalyq sheshimder qaıǵyly oqıǵalarǵa ákep soqtyratyny nazarǵa alyndy.
Qazirgi tańda álem boıynsha seısmıkalyq apattardyń jıilep ketkeni belgili. Senat Tóraǵasy elimizdiń geografııalyq ornalasýyna baılanysty bul máseleni de nazardan tys qaldyrýǵa bolmaıtynyn atap ótti. Aldyn alý jumystaryn kúsheıtip qana qoımaı, ulttyq zańnamaǵa tıisti ózgerister engizý jáne Úkimet pen ákimdikter arasyndaǵy is-qımyldy keshendi túrde júıeleýdiń de ózekti ekeni aıtyldy.
«Azamattyq qorǵaý sııaqty mańyzdy sala tıisti deńgeıdegi qarjylandyrýdy qajet etetini belgili. Búgingi talqylaý atalǵan problemalardy tıimdi sheshýge múmkindik beredi dep úmittenemiz. Aldaǵy ýaqytta Prezıdentimizdiń osy baǵyttaǵy tapsyrmalaryn iske asyrý úshin bárimiz birge nátıjeli jumys isteımiz dep senemin», dedi Máýlen Áshimbaev.
Sondaı-aq Palata Spıkeri parlamenttik tyńdaýdyń qorytyndysy boıynsha usynymdar ázirlenip, Úkimetke joldanatynyn jáne Senat olardyń oryndalýyn baqylaýda ustaıtynyn aıtty.
Tyńdaý barysynda halyqty, obektilerdi, sondaı-aq, qorshaǵan ortany tótenshe jaǵdaılardan qorǵaý júıesiniń tıimdiligin arttyrýǵa jáne jetildirýge arnalǵan birqatar usynym aıtyldy. Senatorlar bólimshelerdi arnaıy tehnıkamen jáne jabdyqtarmen jaraqtandyrýmen qatar, Tótenshe jaǵdaılar mınıstrligin ákimdiktermen jáne qoǵamdyq uıymdarmen birlesip, halyqtyń áleýmettik osal toptarynyń, jetim balalardyń, kóp balaly otbasylardan shyqqan balalardyń, múgedek adamdardyń turǵyn úılerdi tıisinshe paıdalanýyn qadaǵalaý máselelerin pysyqtaýǵa shaqyrdy. Atap aıtqanda, jylytý jáne elektrmen jabdyqtaý júıelerin jóndeý, sondaı-aq, jeke turǵyn úılerde órt detektorlaryn, kómirtegi totyǵy men tabıǵı gaz datchıkterin ornatý qajettiligi týraly sóz boldy.
Parlamenttik tyńdaý kezinde Tótenshe jaǵdaılar mınıstri Syrym Sháriphanov, Ekologııa jáne tabıǵı resýrstar mınıstri Erlan Nysanbaev, Batys Qazaqstan oblysynyń ákimi Narıman Tóreǵalıev, Tótenshe jaǵdaılar jáne tabıǵı apattar qaýpin azaıtý ortalyǵynyń dırektory Serik Áýbákirov jáne taǵy basqa azamattar sóz sóıledi.
