Foto: Turizm_jane_sport_ministrligi
Qazaqstanda sportpen júıeli túrde qansha adam shuǵyldanady? Bul saýalǵa Týrızm jáne sport mınıstri Ermek Marjyqpaev 7,6 mıllıon adam dep jaýap qatty. Bul halyqtyń 38,5 paıyzy degen baılam eken.
Dene shynyqtyrý men sportty damytýdyń tujyrymdamasyn iske asyrýǵa sáıkes, 2029 jylǵa qaraı el turǵyndarynyń jartysyn qamtý josparlanǵan. Memleket basshysynyń tapsyrmasyna sáıkes, óskeleń urpaqtyń sporttyq áleýetin damytýǵa basymdyq beriledi. Osyǵan baılanysty memlekettik sporttyq tapsyrysty iske asyrý boıynsha jumystar belsendi jalǵasyp jatyr. Bıyl 250 myńnan astam bala men jasóspirimdi qamtý úshin jergilikti atqarýshy organdar 43,2 mlrd teńge bóldi. Nátıjesinde 220 myń balaǵa arnalǵan vaýcherler iske qosyldy, bul 6 myńnan astam sport seksııacyna tegin qatysýǵa jol ashty.
Týrızm jáne sport mınıstri sportty odan ári damytý úshin jańa strategııalyq reformalar engizilgenin qosa aıtty. Máselen, qazirgi tańda bas jattyqtyrýshylardy konkýrstyq negizde taǵaıyndaý, sondaı-aq olardyń ókilettikterin keńeıtý arqyly memlekettik jattyqtyrýshylardyń mártebesin arttyrý máselesi talqylanyp jatyr. Sonymen qatar halyqaralyq sport uıymdarynda Qazaqstan mamandarynyń ókildigi jáne álemdik deńgeıdegi tóreshilerdi daıarlaý boıynsha jumys kúsheıtiledi. Kásibı sport klýbtaryn ustaýǵa arnalǵan lımıt jáne sportpen shuǵyldaný úshin eń tómengi jas bekitiledi.
«Orta merzimdi kezeńde sporttyń neǵurlym basym túrleri aıqyndalady. Búgingi tańda elimizde sporttyń 180 túri damyp keledi, olardyń tek 59-y Halyqaralyq Olımpıada komıteti tarapynan moıyndalǵan. Halyqaralyq tájirıbe negizinde «tirek» sporty túrleriniń tizimin qaıta qaraý qajettigi týyndady», dedi E.Marjyqpaev.
Memleket qarjylandyratyn 180 sport túriniń ishinde 59-y olımpıada sanatyna enedi. Tizim qaıta túzilgende ulttyq sport túrleri de syzylyp kete me degen kóptiń saýalyna qatysty jaýabynda mınıstr ulttyq sportqa nuqsan kelmeıtinin aıtty.
