Otandyq arheologııa ǵylymynda óz aldyna mektep qalyptastyrǵan kórnekti ǵalymnyń esimi elimizge ǵana emes, alys-jaqyn shet memleketterdegi ǵylymı ortaǵa da óte tanymal. Ortalyq Azııadaǵy paleolıt dáýiri men Eýrazııanyń ejelgi tarıhyn indete zerttep júrgen arheologtiń san qyrly ǵylymı salasy Eýrazııadaǵy alǵashqy adamdardyń qonystanýy, olardyń materıaldyq mádenıeti, kóshi-qon jáne etnostyq baılanystaryna baǵyttalǵan. Ásirese ǵalymnyń elimizdiń ár óńirinen 300-den asa paleolıt eskertkishin ashyp, qazaq jerinde alǵashqy adamnyń shamamen 1 mıllıon jyl buryn paıda bolǵanyn ǵylymı dáleldegenin erekshe aıtýǵa bolady. Shyn máninde, bul eldi eleń etkizer úlken jańalyq.
Alqaly jıynda Mádenıet jáne aqparat mınıstrligi Mádenıet komıtetiniń tóraǵasy Kúmis Seıitova mınıstr Aıda Balaevanyń quttyqtaýyn oqyp, ǵalymnyń ıyǵyna shapan japty. Quttyqtaýda J.Taımaǵambetovtiń arheologııa salasyna tyń jańalyq ákelgen eńbekterine joǵary baǵa berilgen. Odan keıin Ǵylym jáne joǵary bilim vıse-mınıstri Darhan Ahmed-Zákı atalǵan vedomstvo basshysy Saıasat Nurbektiń quttyqtaýyn jetkizdi. Belgili qoǵam qaıratkeri Darhan Myńbaı ǵalymnyń ómirlik muratyna toqtalyp, parasatty oı qorytty.
«Qoja Ahmet Iаsaýı babamyz: «Shyn ǵalymdy kórsem, basymdy ıip, taǵzym etemin», degen eken. Mine, osyndaı shyn ǵalymnyń úlgisi – Jáken Qojahmetuly. Onyń aldynda arheologııa salasynda Álkeı Marǵulan bastaǵan ǵalymdardyń salǵan izi boldy. Biraq olarǵa qaraǵanda Jákenniń bir ereksheligi bar. Ǵalymnyń eńbekteri shet tilderine aýdarylyp, dúnıejúzine tanylýǵa múmkindigi boldy. Bul – táýelsizdiktiń arqasy. Ony umytpaýymyz qajet. Nátıjesinde, ol álemniń úlken ǵylymı minberlerinde tamasha ǵylymı eńbekterimen kez kelgen aýdıtorııany tyńdata bildi. Ulttyq mýzeıdi ǵylymı ortalyq jasaý retinde «Halyq qazynasy» atty ınstıtýttyń negizin qalap, shákirtterin soǵan uıystyrdy», dedi Darhan Myńbaı.
Tas dáýirin sóıletken ǵalymnyń mereıtoıyna arnalǵan konferensııa 2 seksııaǵa bólindi: birinshisi – «Eýrazııa paleolıtiniń máseleleri», ekinshisi – «Ǵylymdaǵy ómir: J.Taımaǵambetov jáne ekspedısııalary». Oǵan qatysýǵa AQSh, Fransııa, Germanııa, Kanada, Ispanııa, Polsha, Japonııa, Reseı, Mońǵolııa, Qyrǵyzstan, Tájikstan jáne taǵy basqa da elderdegi ǵalymdardan ótinim men baıandamalar kelip túsken. Konferensııa barysynda arheologtiń tas dáýiriniń túrli teorııalyq jáne ádisnamalyq máseleleri, elimizdiń ǵana emes, jalpy Eýrazııanyń paleolıt dáýirin zertteýdegi jańa jetistikteri ár qyrynan talqylandy. Sony oılar aıtyldy. Ulttyq mýzeı, Á.Marǵulan atyndaǵy Arheologııa ınstıtýty jáne Ál-Farabı atyndaǵy Qazaq ulttyq ýnıversıteti birlesip daıyndaǵan mereıtoı ıesiniń ǵylymı eńbekteri men bıblıografııalyq kórsetkishterin toptastyrǵan 4 kitaptyń lentasy qıyldy. Jıyn aıasynda Ulttyq mýzeı qonaqtar men qatysýshylarǵa arnap «Akademık. J.Taımaǵambetovtiń ǵylymı jolynyń kezeńderi» atty kórme uıymdastyrdy. Oǵan ǵalymnyń monografııalary, oqýlyqtary, oqý quraldary, ǵylymı maqalalary, sonymen birge keıingi jyldary tabylǵan paleolıt turaqtarynyń artefaktileri qoıyldy.
