muratsaveliev
«О́zderińizdeı qonaqjaı, meıirimdi halyqpen tanysýǵa múmkindik bergenderińiz úshin jáne qoldaý tanytqandaryńyz úshin myń alǵys! Men Qazaqstannyń ár ulyna, qyzyna, anasyna, ákesine tántimin jáne rızamyn!
Dostar, meniń vızamnyń ýaqyty aıaqtaldy, týǵan jerden ketýim kerek, biraq men jaqynda oralamyn. Men týǵan anamdy izdeý jumysyn toqtatpaımyn. Keshe Qazaq radıosynyń «Barmysyń, baýyrym?» habarynyń redaksııasyna meniń atymnan sot otyrysyna qatysýǵa, maǵan qatysty kez kelgen málimetke qol jetkizýge, meniń atymnan aryz, ótinish, shaǵym jazýǵa zań boıynsha tolyq ruqsat berdim. Qazaqstanǵa kelgeli qanshalyqty emosıonaldy kúıde bolǵanymdy kórdińizder, men úshin tym aýyr kúnder boldy. Nátıjesinde men ózime biraz ýaqyt bólýdi jón kórdim, sondyqtan Ispanııaǵa birden qaıtpaımyn, birer kún Taılandta bolamyn. Oıymdy jınaqtap, demalyp alǵym keledi», dep jazdy Murat.
2002 jyldyń 17 qańtarynda Arqalyq qalasyndaǵy perzenthanada ómirge kelgen Muratty 2004 jyly balalar úıinen belgııalyq jalǵyzbasty áıel asyraýǵa alyp ketken. Araǵa 19 jyl salyp týǵan jeri, atamekenine anasyn izdep kelgen jigit eń bastysy týǵan elin, Otanyn tapqanyna baqytty ekenin jazdy. Ár qazaq ózin baýyryna basyp, jaqyn tartqanyna razylyǵyn bildirdi.
