Jańa mektep ǵımaratynyń qurylysyna arnalǵan oryndy Rıdder qalasynyń ákimdigi anyqtaıdy. Oryn álbette turǵyndarǵa qolaıly bolýǵa tıis. Sonymen qatar qala ákimdigi barlyq qajetti ınjenerlik kommýnıkasııalardy jetkizýdi qamtamasyz etedi. Mekteptiń qurylysyn qysqa merzimde aıaqtaý josparlanǵan.
Memorandýmǵa qol qoıý barysynda Shyǵys Qazaqstan oblysynyń ákimi Ermek Kósherbaev áleýmettik bastamalardy óz moınyna alatyn iri kásiporyndardyń eńbegin erekshe atap ótti.
– Rıdder qalasynda 16 mektep jumys isteıdi. Alaıda kóptegen mekteptiń qabyrǵasy ótken ǵasyrdyń 30-jyldary qalanǵan. Myńdaǵan turǵyny bar qalada sońǵy ret mektep 1974 jyly, odan soń tek 50 jyldan keıin 2022 jyly ǵana boı kótergen. Sondyqtan zamanaýı kabınettermen jasaqtalyp, barlyq qajetti zattarmen jabdyqtalǵan jańa jaıly mektep salý – balalar úshin, pedagogter men ata-analar úshin tamasha syılyq bolady, – dedi E.Kósherbaev.
Eksportqa baǵdarlanǵan «Kazsınk» sııaqty iri kásiporyn úshin jańa mektep salý – bıznestiń áleýmettik jaýapkershiligi ǵana emes, sonymen qatar kompanııa qyzmetkerleri úshin qolaıly orta qurý maqsatyndaǵy uzaqmerzimdi ınvestısııa.
– Bizdiń kompanııa qyzmetkerleriniń jartysyna jýyǵy Rıdderde jumys isteıdi. Biz jalpy qalanyń damýyna, onyń ishinde mamandarymyz ben olardyń otbasylaryna qolaıly jaǵdaı jasaý máselesine aıryqsha kóńil bólemiz. Búgingi memorandým – iri bıznes pen memlekettik organdardyń osy baǵyttaǵy tıimdi áriptestiginiń tamasha úlgisi, – dedi «Kazsınk» JShS bas dırektory Aleksandr Hmelev.
Jańa mektep salý – orta bilim berý uıymdarynda jaıly jáne qaýipsiz bilim berý ortasyn qurýdyń taǵy bir qadamy. Oqýshylar sapaly bilim alý múmkindigine ıe bolady. Eń bastysy, qazaq mektebiniń máselesi sheshiledi. Esterińizde bolsa, úlken qoǵamdyq rezonans týdyrǵan «Shańyraq» mektebiniń oqýshylary qazirgi tańda №11 jańa mektepke kóshirilgen edi.
Aıta keteıik, byltyrǵy tamyz aıynan bastap Rıdderde «Jaıly mektep» ulttyq jobasy aıasynda taǵy bir jańa mekteptiń qurylysy bastalǵan. Bul baǵdarlamanyń maqsaty – orta bilim berý uıymdaryndaǵy apatty nysandardy, úsh aýysymdy oqytýdy jáne oqýshy oryndarynyń tapshylyǵyn joıý.
Shyǵys Qazaqstan oblysy
