Ashylý saltanatynda sóz alǵan Túrkııanyń Qazaqstandaǵy tótenshe jáne ókiletti elshisi Mustafa Kapýdjý sýretshi shyǵarmashylyǵyna joǵary baǵa berdi. Onyń aıtýynsha, kórmege qoıylǵan kórkem týyndylarda Osmanly, Vızantııa, Anadoly órkenıetteri kórinis tapqan.
Túrik sýretshisi osy ýaqytqa deıin 200-den asa jeke jáne toptyq kórmelerge qatysqan eken. Onyń qylqalamynan shyqqan jumystar Eýropa, AQSh, Kanada, Meksıka, Arab túbegi elderi, Reseı, Moldova, Ýkraına, túrkitildes Azııa memleketteri, Qytaı, Taıvan, Koreıa jáne Japonııa sekildi kóptegen elde kórsetilip keledi. «Qazaqstanda kórme ashqanyma qýanyshtymyn. Búgingi kórmege 40 sýretimdi ákeldim. Munda mádenıetterimizdiń uqsas jaqtaryn kórsetýge tyrystym. Týyndylarymda qoldanylǵan naqyshtarda Ahmet Iаsaýıden Qorqyt ataǵa deıin kóptegen izdi kórýge bolady», deıdi sýretshi. Sondaı-aq óner ıesi týyndylary keshegi 16 memlekettiń negizin qalap, kúldeı janyp, qaıta túlegen túrkilerdiń tarıhyna negizdelgenin jetkizdi. Onyń ishinde kórme taqyrybyna anar jemisin tańdap alýynda da úlken mán jatyr. Sebebi anar – túrki halyqtary úshin molshylyq pen berekettiń bastaýy. «О́zimdi erekshe sýretshi dep qabyldamaımyn. Mendegi aıyrmashylyq sol, týyp-ósken jerimniń dástúrlerin negizge alyp sýret salamyn. Sol dástúrli sýretti zamanǵa saı etip modernızasııalaýǵa kóńil bólemin. Kórmege qoıylǵan kartınalarym ótken tarıhtyń izin taný jolyndaǵy osy úderistiń kýási bolýǵa shaqyrady. Jady uǵymy turǵysynan bul kórmeni ata-babamyzdyń mekeni – Qazaqstanda ótkizý jobama ózindik ári erekshe kózqaras beredi dep senemin», deıdi túrik sýretshisi.
