Foto: Turizm_jane_sport_ministrligi
Jıynǵa Ulttyq sport qaýymdastyǵynyń, Ulttyq jáne at sporty túrleri ortalyǵynyń, 5-shi Dúnıejúzilik kóshpendiler oıyndaryn ótkizý jónindegi dıreksııasynyń basshylyǵy jáne Ulttyq sport federasııalarynyń prezıdentteri qatysyp, atqarylyp jatqan jumystary týraly baıandady.
Mınıstr Ermek Marjyqpaev Memleket basshysy Qasym-Jomart Toqaevtyń «Egemen Qazaqstan» gazetine bergen suhbatynda Dúnıejúzilik kóshpendiler oıyndaryn ótkizý – elimiz úshin mańyzdy sporttyq is-shara ekenin aıtty.
«Oıyndardyń bastalýyna bir jyldan az ýaqyt qaldy. Memleket basshysynyń tapsyrmasyna sáıkes, 5-shi Dúnıejúzilik kóshpendiler oıyndaryn joǵary deńgeıde uıymdastyrýymyz qajet. Búginge deıin qandaı sharalar atqaryldy, alda qandaı mindetter tur, sonymen qatar qandaı máseleler bar ekenin anyqtaýymyz qajet. Oıyndarǵa daıyndyq jaǵdaıyna keler bolsaq, ázirge is-sharalar jospar boıynsha júrip jatyr. Ulttyq sport túrlerinen qurama komandalardyń daıyndyǵy joǵary deńgeıde ótýi kerek. Sonymen qatar sportshylarǵa sapaly jaǵdaı jasap, qarjy máseleleri tolyq sheshilýge tıis», dedi mınıstr.
«V Dúnıejúzilik kóshpendiler oıyndaryna álemniń 100-den astam elinen delegasııa keledi. Oıyndardyń biregeıligi – sporttyq, mádenı jáne ǵylymı baǵdarlamalardyń ushtasýynda. Baǵdarlamaǵa 20 jarystyq jáne 10 kórneki sport túri kirip, 110 medal jıyntyǵy oınatylady. Jarys at sporty, ulttyq kúres, sadaq atý, qustarmen ań aýlaýdyń túrleri, dástúrli zııatkerlik oıyndar boıynsha ótedi» delingen aqparatta.
2024 jylǵa arnalǵan sporttyq-buqaralyq is-sharalardyń biryńǵaı respýblıkalyq kúntizbesine kiretin sport túrleri boıynsha jarystardyń tizbesi bekitildi. Oıyndarǵa daıyndyq sheńberinde Ulttyq qurama komandalardyń sportshylary 2024 jylǵy qańtardan bastap 13 halyqaralyq, 39 jergilikti oqý-jattyǵý jıyndaryna jáne 17 respýblıkalyq jáne 23 halyqaralyq jarysqa qatysady. Bıylǵy jyldyń basty dodasy – Parıj jazǵy Olımpıadasy men Paralımpıada oıyndary.
