Saltanatty is-sharaǵa Týrızm jáne sport mınıstri Ermek Marjyqpaev, Ulttyq olımpıada komıtetiniń ókilderi, sport ardagerleri, federasııa basshylary men memlekettik jattyqtyrýshylar qatysyp, IV qysqy Jasóspirimder olımpıadasynyń ashylý rásiminde tý ustaıtyn sportshylarǵa el baıraǵy saltanatty túrde tapsyryldy. Jasóspirimder olımpıadasynyń ashylý saltanatynda elimizdiń baıraǵyn short-trekten el chempıony, sport sheberine úmitker Erasyl Shyńǵyshan jáne konkımen júgirý sportynan sport sheberi, sondaı-aq el birinshiliginiń jeńimpazy Krıstına Shýmakova alyp shyǵady. О́z kezeginde Erasyl Shyńǵyshan tý ustaýshy retinde kópshiliktiń aldyna shyǵyp, saltanatty túrde ant berdi.
Jasóspirimder olımpıadasynda Qazaqstannyń jasóspirimder quramasy sporttyń 5 túrinen baq synap, 55 medal jıyntyǵyn sarapqa salady. Qysqy oıyndarda el namysyn 42 sportshy bıatlon, kerlıng, konkımen júgirý, short-trek, shańǵy jarysy, tramplınnen sekirý, taý shańǵysy, shańǵy qossaıysy, frıstaıl mogýl jáne shaıbaly hokkeı sport túrlerinen qorǵaıdy. Saltanatty jıynda mınıstr sóz sóılep, sportshylarǵa sáttilik tiledi.
«Qurmetti sportshylar, barlyq kezeńnen súrinbeı ótip Ońtústik Koreıanyń Kanvon qalasynda ótetin IV qysqy Jasóspirimder olımpıadasyna elimizdiń namysyn qorǵaýǵa attanǵaly tursyzdar. Álemdegi jetekshi sportshylardyń qataryna kire aldyńyzdar», dedi E.Marjyqpaev.
Mınıstrdiń málimetinshe, elimiz táýelsizdik alǵaly Jasóspirimder olımpıadasynda 29 medal jeńip aldy, onyń beseýi – qysqy olımpıadadan.
«Elimizde qysqy sport túrlerinde jeńispen órilgen jaqsy dástúr bar. Búginde tek elimizge ǵana emes, búkil álemge tanymal dańqty sportshylarymyz halyqaralyq qysqy jarystarda óner kórsetip, únemi júldegerler qatarynan kórinip júrdi. Olardyń qatarynda shańǵyshy Vladımır Smırnov, konkımen júgirýshi Lıýdmıla Prokasheva, bıatlonshy Elena Hrýstaleva, mánerlep syrǵanaýshylar Denıs Ten, Elızaveta Tursynbaeva bar. Sizder bul oıyndarǵa qatysa otyryp, zor tájirıbe jınaısyzdar. Osy qundy tájirıbe bolashaqta paıdaly bolatyny sózsiz, óıtkeni sizder Qazaqstan ulttyq quramasynyń rezervi sanalasyzdar. Búgin biz dástúrli shyǵaryp salý rásimine qatysyp otyrmyz. Sizderge aldaǵy jarysta tek sáttilik tileımin. Osyǵan deıin jıǵan bar sheberlikterińizdi, qabiletterińizdi pash etip, joǵary nátıje kórsetýlerińizge jáne jeke rekordtaryńyzdy jańartýǵa tilektespin! Biz sizderge jankúıer bolyp, jeńis tuǵyrynan kórinýlerińizge shyn nıetpen tileýles bolamyz», dedi mınıstr.
Jarystyń ashylý saltanaty 19 qańtarda Kannyn qalasyndaǵy «Gangneuung Oval» sport kesheninde ótedi. Bul nysanda konkımen júgirý sportynan jarystar uıymdastyrylady. Al Olımpıadanyń jabylý saltanaty 1 aqpan kúni sol «Gangneung Olympic Park» sport kesheninde ótedi dep josparlanǵan.
Mınıstrliktiń málimetinshe, Kanvon-2024 qysqy Jasóspirimder olımpıadasyna 14 pen 17 jas aralyǵyndaǵy álemniń 70 elinen 1 800 sportshy qatysady. Munda 7 sport túriniń 15 baǵdarlamasy boıynsha 81 medal jıyntyǵy sarapqa salynady.
