Foto: upl.uz
Tolqyn Qylyshev 91 keliden joǵary salmaqta álemdik dodalarda atoı salyp júrgen, Qamshybek Qońqabaevtyń qarsylasy Bahodır Jalolovtyń tól shákirti ekenin tilge tıek etip, onyń qalaı chempıon atanǵanyn aıtyp berdi. Temirdeı tártiptiń arqasynda túlep ushyp, dúnıeni dúbirletip júrgen shákirtteri Tolqyn bapkerden talaı «taıaq jegenge» uqsaıdy...
Ol tilshi Almas Manaptyń «Sizdi qatal bapker deıdi. Jaýabyn ózińizden estıik» degen saýalyn teriske shyǵarmady.
«Tártipke basymdyq beretinim ras. Bahodırdi «skakalkamen» talaı sabaǵanmyn. Keıde qasymdaǵy jattyqtyrýshylar ara túsetin. Sondaı qatal tártiptiń nátıjesinde Bohodır chempıon bolyp júr. Qazir maǵan rahmet aıtady. Aıtpaqshy, Bahodırdi shyńdaýǵa Qazaqstan da edáýir úles qosty. Bahodır, Israıl, Mýrodjon, Elnur bastaǵan myqty shákirtterimniń barlyǵy Qazaqstan arqyly álemge tanyldy. Sizderde jastar men eresekter arasynda jylyna 10-15 týrnır uıymdastyrylady. Astana, Almaty, Pavlodar, Qostanaı, Atyraý, Aqtaý, Shymkent, Túrkistan sekildi qalalarda ótetin týrnırlerge shákirtterimdi talaı aparǵanmyn. Keıde bir qaladaǵy týrnırdi támamdap, elge qaıtpaı, birden ekinshi shahardaǵy dodaǵa top ete túsetinbiz. Boksshylarymyzdy týrnırlerge kóbirek qatystyryp, tájirıbe jınaqtaý basty maqsat boldy. Jalolov, Madrımov, Ahmadalıev sekildi boksshylar jastar men eresekter arasyndaǵy jarystarǵa qatar qatysa beretin. Bahodır jas kúninde aryq, boıshań boldy. 92 kıloda judyryqtasatyn. Beti qaıtyp qalmasyn dep Alekseı Sevastıanovtyń jeke bapkerine «shákirtiń baıqap ursyn, ekinshi raýndta rıngke shyǵarmaımyz» dep ótinish aıtqan kezimiz de bolǵan. Sóıtken Bahodır qazir abyroıymyzdy asyryp jatyr», dedi О́zbekstan quramasynyń bokstan bas bapkeri.
Búginde Bahodır Jalolov áýesqoı bokstan bólek, kásipqoı boksta da baǵyn synap, babyn shyńdap júr. Tilshi bapkerden onyń qos maıdanda júrgeni qanshalyqty durys dep surady.
«О́te qıyn. Biraq basqa amalymyz joq. Bahodır – jastardyń kýmıri, betkeustarymyz. Ol kásipqoı boksta 13 jekpe-jek ótkizip úlgerdi. Parıj olımpıadasynan keıin tolyqtaı kásipqoı boksqa aýysady», dedi Tolqyn Qylyshev.
О́zbek eliniń bokstaǵy jas órenderi men Parıj Olımpıadasynan kútip otyrǵan júldeleri týraly «Egemen Qazaqstan» gazetiniń búgingi sanynda jaryq kórgen Almas Manaptyń «Tolqyn Qylyshev, bokstan О́zbekstan quramasynyń bas bapkeri: Bizge qazaq boksynyń myqty bolǵany kerek» maqalasynan tolyq oqı alasyz.
