Oqý pýnktiniń 1-shi jáne 2-oqý rotasynyń sarbazdary ózderiniń shyǵarmashylyq darynyn synap, biri jeke daýysta estradamen án salsa, endi biri dombyra men gıtarada oınap, otandyq jáne sheteldik estrada juldyzdarynyń repertýarlarynan ánder oryndady. Barlyq qatysýshy erekshe daryndy ekenin baıqatty. Úsh saǵatqa sozylǵan baıqaýda kórermen de toqtaýsyz qol soǵyp, rızashylyǵyn bildirdi. Osynyń ózi sarbazdardyń demalys kúnderin tıimdi maqsatqa jumsap, bólimshe qabyrǵasynda ózderi qalaǵan ónermen aınalysýyna múmkindik beriletininiń kórinisi bolsa kerek.
«Áskerı bólim deńgeıinde biz kóptegen is-shara ótkizemiz, olar áskerı qyzmetshilerdiń bastamasy boıynsha merekelik kúnderge arnalýy da múmkin. Biraq bir aıta ketetin jaıt, kópshiligi kórip júrgen áskerı kıim kıgen, buıryqtardy oryndaıtyn áskerılerdiń artynda talantty, ónerpaz adam turýy múmkin. Sondyqtan án baıqaýy sarbazdyq qasıet pen patrıottyq sezimdi bir arnaǵa toǵystyryp, rýhanı baı, shyǵarmashyl jastardy áskerılerdiń qoǵamdyq ómirine tartý maqsatynda uıymdastyryldy», dep atap ótti tárbıe jáne áleýmettik-quqyqtyq jumystar bólimshesiniń basshysy, maıor Dýlat Sháripbaev.
Baıqaý qorytyndysy boıynsha 3-orynǵa qatardaǵy jaýynger Eldar Sovetalıev ıe bolsa, 2-oryn qatardaǵy jaýynger Iýrıı Polıakovqa berildi. Al baıqaýdyń jeńimpazy retinde qatardaǵy jaýynger Jalǵas Qapasovtyń esimi ataldy. Jeńimpaz atanǵan áskerıler basshylyq tarapynan Alǵyshattarmen jáne gramotalarmen marapattaldy.
