О́tken jyly agenttik memlekettik qyzmetke irikteýdi tolyq sıfrlandyrý arqyly «e-Qyzmet» ıntegrasııalanǵan aqparattyq júıesin jańǵyrtý boıynsha jumystar júrgizdi. «Memlekettik qyzmetke irikteýdiń jańa algorıtmi 6 memlekettik organda synaqtan ótti. Jańa irikteý algorıtmi ázirlenip, onda konkýrstyq rásimdi ótkizý formaty qaıta qaraldy. Bul qadam úmitkerlerge aldyn ala belgilengen ýaqytta ótetin áńgimelesýden basqa barlyq kezeńde, kez kelgen ýaqytta jáne álemniń kez kelgen núktesinen konkýrsqa qatysýǵa múmkindik berdi», deıdi D.Jazyqbaı.
Memlekettik organdarda ótkizilgen myńnan astam konkýrsqa 5 815 úmitker qatysyp, onyń 652-si ótti. Onlaın júıe boıynsha bir orynǵa qatysýshylardyń úles kórsetkishi 4,6 adamdy qurap, qoldanystaǵy (1,7 adam) irikteý tártibimen salystyrǵanda qatysýshylardyń sany 2,7 esege artty. Bul azamattardyń jańa joba aıasynda memlekettik qyzmetke degen qyzyǵýshylyǵy artqanyn kórsetip otyr. Bıyl jańa irikteý júıesin kezeń-kezeńmen barlyq memlekettik organǵa engizý josparlanyp otyr.
«e-Qyzmet» júıesi mańyzdy aqparattyq júıelermen ıntegrasııalanyp, ózge aqparattyq júıelerden úmitker týraly aqparat alý, onyń sottylyǵyn nemese ózge zań buzýshylyqtarǵa qatysy bar-joǵyn tekserý, biliktilik talaptaryna saı kelýin qaraý úrdisteri avtomattandyryldy. Bul memlekettik qyzmetke úmitkerlerdi artyq qujat jınaýdan bosatty.
Memleket basshysy 2022 jylǵy «Ádiletti memleket. Birtutas ult. Berekeli qoǵam» atty Qazaqstan halqyna Joldaýynda Memlekettik qyzmet isteri agenttigine tolyqqandy strategııalyq HR ınstıtýtyna aınalý mindetin qoıǵan bolatyn. Agenttik osy baǵytta tıisti daıyndyq jumystaryn júrgizip, ótken jyly Prezıdent janyndaǵy Memlekettik basqarý akademııasy ishinen Adamı resýrstardy basqarý ınstıtýty quryldy. Bul mekeme quzyrettilikti baǵalaý, HR-analıtıka, talant menedjment, testileý, aqparattyq júıeni súıemeldeý tárizdi bes baǵyt boıynsha jumys atqarmaq.
Memleket basshysynyń «Memlekettik apparattyń qyzmetin bıýrokratııadan aryltý jónindegi sharalar týraly» Jarlyǵymen agenttikke monıtorıng jáne taldaý júrgizý boıynsha fýnksııa júktelgeni málim. О́tken jyly saýda jáne ıntegrasııa, qarjy, halyqaralyq qatynastar, aýyl sharýashylyǵy, ekologııa jáne tabıǵı resýrstar syndy 5 salalyq baǵyt boıynsha taldaý júrgizildi. Monıtorıng qorytyndysyna sáıkes adam qajettiligine jáne servıstik memlekettik apparatty qalyptastyrýǵa, sondaı-aq bıýrokratııalyq kedergilerdi azaıtýǵa baǵyttalǵan usynystar ázirlendi.
«Onyń ishinde memlekettiń qatysýy tıimsiz, kvazımemlekettik sektordy qosa alǵanda, 200-den astam uıymdy taratý jáne qaıta uıymdastyrý nemese olardyń fýnksııalaryn básekelestik ortaǵa berý, jergilikti atqarýshy organdardyń 70-ten astam fýnksııasyn tómengi deńgeıge túsirý arqyly ońtaılandyrý, 100-ge jýyq qyzmet alý kezinde tólenetin memlekettik bajdy jáne memlekettik organdar salatyn birqatar aıyppul túrin alyp tastaý, memlekettik qyzmetterdiń 50 túri boıynsha aqparattyq júıelerdi ıntegrasııalaý múmkindigin qarastyrý syndy usynystar bar», deıdi D.Jazyqbaı.
Onyń aıtýynsha, memlekettik organdarmen birlesken jumystyń nátıjesinde memlekettik apparatty bıýrokratııadan aryltý boıynsha 550-den astam keıs daıyndalǵan. Bul keıster usynys retinde Úkimetke engizildi. Olardyń 152-sin iske asyrý úshin zańnamalyq deńgeıde sheshimder qabyldaýdy qajet etedi.
«Máselen, osyndaı zańnamalyq bastamalar oblystyq jáne aýdandyq mańyzy bar qalalardaǵy jer komıssııasy ınstıtýtyn qysqartýǵa múmkindik berdi. Bul óz kezeginde qyzmet berýshilerdiń jaýapkershiligin arttyrýǵa jáne qyzmet kórsetý úrdisteri men merzimderiniń qysqarýyna áser etedi», dedi agenttik tóraǵasy. Bıyl agenttik ákimshilik kedergilerdi jáne bıýrokratııalyq áýre-sarsańnyń joıylýyn qamtamasyz etetin zań jobasyn ázirleýdi josparlap otyr.
Agenttik ótken jyly memlekettik qyzmet kórsetý sapasyn baqylaý salasynda 498 tekserý júrgizip, 66 myń zań buzýshylyqty anyqtady. Nátıjesinde, 898 laýazymdy tulǵa – tártiptik, 365-si ákimshilik jaýapkershilikke tartyldy.
Qyzmet alýshylardyń quqyqtaryn proaktıvti túrde, olardyń shaǵymdaryn kútpeı-aq, qashyqtan monıtorıng júrgizý tıimdiligin kórsetip otyr. Buzýshylyqtar anyqtalǵan jaǵdaıda zańdylyqty qalpyna keltirý jáne qyzmet alýshylardyń quqyqtarynyń buzylýyna jol bermeý boıynsha sharalar qabyldanady. Monıtorıngileý nátıjesinde, óńirlerde aqparattyq júıe arqyly 11 myńnan astam zań buzýshylyq anyqtalyp, 360 azamattyń quqyqtary qalpyna keltirildi.
Memlekettik qyzmet kórsetý úrdisterin jetildirý maqsatynda júıeli taldaý júrgizilip keledi. Nátıjesinde, «elektrondyq úkimet» portalynda jumys istemeı turǵan 40 memlekettik qyzmet anyqtaldy. Qazirgi ýaqytta olardyń 14-i iske qosyldy, qalǵan 26-syn iske qosý jumystary júrgizilip jatyr.
О́tken jyly agenttik memlekettik qyzmetshilerdiń Ádep kodeksine túsindirmeler ázirledi. Olar kodekstiń normalaryn tájirıbede qoldaný barysynda durys túsinýge baǵyttalǵan.
Jalpy, byltyr ádep jónindegi keńesterdiń 195 otyrysy ótip, 1 300-den astam ótinish qaralypty. Agenttiktiń úılestirýimen óńirlerde ádep jónindegi ýákilder tarapynan aýqymdy túsindirme jumysy júrgizilip, 26 myńnan astam azamat pen memlekettik qyzmetshige jeke konsýltatıvtik kómek kórsetildi.
Aıta ketý kerek, 2023 jyly agenttik tarapynan 396 tekserý júrgizilip, 13 myńnan astam buzýshylyq anyqtalǵan. Tekseris qorytyndysy boıynsha zańsyz aktilerdiń kúshin joıý týraly 345 usynym jáne uıǵarym engizilip, olardyń 97,9%-y tolyǵymen oryndaldy. Baqylaý sharalarynyń nátıjesi boıynsha qabyldanǵan sheshimderdiń arqasynda 191 azamattyń quqyǵy qorǵaldy.
