Fotokollaj: Azattyq Rýhy
Oıyn bıznesi salasyn memlekettik retteýdiń ózekti máseleleri talqylaýdyń basty taqyryby boldy. Komıtet tóraǵasy Nurtóre Júsip kezdesýdi asha kelip, qumar oıyndardyń keń qanat jaıýy men taralýy qazirgi qoǵamdaǵy ózekti másele bolyp qala beretini, elimizdiń ekonomıkalyq jáne áleýmettik ál-aýqatyna teris áser etetinin atap ótti.
«Oıyn bıznesi týraly», «Lotereıalar jáne lotereıa qyzmeti týraly» arnaıy zańdar qabyldandy. Alaıda, kún saıyn oıyn, býkmekerlik jáne lotereıa qyzmetin júzege asyratyn qurylǵylardyń kóptegen jańa túrleri kúndelikti ómirge enip jatyr, al onlaın-kazıno men sıfrlyq stavkanyń jarnamalary ınternetke shyǵady. Munyń bári adamdardyń ońaı aqsha tabýǵa umtylysyn kúsheıtedi jáne lýdomanııa men qumar oıyndardyń keń taralýyna ákeledi. Búgin, beıresmı málimetter boıynsha, elimizde 350 myńǵa jýyq adam lýdomanııa dertine shaldyqqan. Bul áleýmettik qater», dedi Nurtóre Júsip.
Kezdesýge qatysýshylar lýdomanııamen kúreske kedergi keltiretin máselelerdi talqylady. Olardyń qatarynda lýdomanııanyń emdeý ádisi men damýynyń obektıvti sebebi týraly shynaıy aqparattyń bolmaýy, zańsyz oıyn bıznesi úlesiniń kóptigi, sondaı-aq qoldanystaǵy zańnamanyń álsizdigi de bar.
Depýtattar kezdesýdi qorytyndylaı kelip, osy júzdesýdiń oıyn bıznesin retteýdi jaqsartýǵa ǵana emes, lýdomanııamen kúres jáne qoǵam múddesi men densaýlyǵyn qorǵaýda eleýli ilgerileýge mańyzdy úles qosatynyna senim bildirdi.
