Foto: Erlan Omar
Ádebı keshte «Qazaq gazetteri» JShS-niń bas dırektory Dıhan Qamzabekuly bul býyn ádebıetke at shaldyrǵan jyldary tyrnaqaldy týyndylary osy gazette jarııalanyp, kópshilikke tanylǵanyn, jastar búginde ujymda eńbek etip qana qoımaı, orasan daıyndyqpen bilek túrine kirisip súbeli kitaptaryn da jaryqqa shyǵarǵanyna alǵysyn bildirdi.
«Qazaqtyń sóz ónerin keleshekke jalǵaıtyn tolqynnyń ekpinine qarap qýanasyń. Ádebıet oqylmaıdy degen arzan sóz. Gazetimizdi oqıtyn kóziqaraqty oqyrman jaqsy biledi redaksııanyń ádebıet pen mádenıet bólimindegi qyzmet isteıtin osy jas býyn tól mádenıetimiz, rýhanııatymyzdyń arǵy-begi salmaǵyn eksheı otyryp, ózindik ólshem, synı salystyrý arqyly taldaǵan eńbekterin de oqýshy qaýymǵa usyna alyp júr. Bul jigitterdiń ulttyq, salalyq jyr músháıralarda, ádebı alaman báıgelerde de olja salyp, oza shabýy ózderiniń ıntellektýaldyq deńgeıi men parasat-paıymynyń bıiktigin baıqatady», degen D.Qamzabekuly «Egemen jastar» jobasy tek tól gazetke ǵana emes, ulttyq basylymdar úshin de mańyzy zor ekenin aıtty.
«Egemen Qazaqstan» gazeti bas redaktorynyń orynbasary Talǵat Batyrhan redaksııada jastardyń shyǵarmashylyǵyn shyńdaýyna, kúndelikti tirshilik aǵysynyń eshqandaı tosqaýyl emes ekenin atap ótti.
«Erteden erip kele jatqan tirkes bar ózi, «siresken SQ» degen. Sol «siresken SQ-nyń seńin Aqseleý Seıdimbek buzyp edi. Jasyrary joq, «Sosıalıstik Qazaqstan» kezinde gazettiń siresken kezeńi boldy. Aqseleý aǵa mádenıet bólimine aýysyp kelgende osy qasań túsinikti kúl-talqan etti. Qazir gazet aptasyna bes márte shyǵyp, 80 myńnan asa tırajben oqyrmanǵa taralady. Aptasyna eki ret «Ádebı kaleıdoskop» jáne «Mádenı mozaıka», «Ádebıettiń áńgimesi», «Rýhanııat» degen arnaıy bet shyǵady. Tipti keıbir ádebı gazetterge qaraǵanda «Egemen Qazaqstan» ádebıet pen mádenıettiń aǵysyndaǵy tushymdy dúnıelerdi kóbirek jarııalaıdy. Gazettiń buljymas bir mindeti – esim-soıy jurt jadynan kómeski tartyp umytyla bastaǵan tulǵalardy qaıta jańǵyrtyp jarııalaý. «Umytpańdar meni» aıdarymen de ádebıet pen mádenıettiń qadaý-qadaý tulǵalarynyń shyǵarmashylyǵyna, san taraý taǵdyryna qatysty súıekti dúnıelerdi de jarııalaımyz. Jańa esim, jas býyn da qoltyǵyn sóge kósilsin dep shyǵarmashylyq áleýetin arttyrýyna dem berip, týyndylaryn usynyp júrmiz. Munyń barlyǵy da ádebıettiń qazirgi ókili sanalatyn jastarǵa degen qamqorlyqtyń belgisi», dedi Talǵat Batyrhan.
Jazýshy Qýanysh Jıenbaı qandaı týyndy jazsań da aıtar oıyń oıdaǵy qoıshy men emen esiktiń arǵy jaǵyndaǵy mınıstrge de uǵynyqty tilmen jetkizilýi tıis ekenin eskertti.
«Qundy shyǵarma eshqashan eskirmeıdi. Men 1980 jyldary «Jer silkinisinen bir juma buryn» degen povest jazdym. Jaqynda Almatyda jáne birneshe oblysta sezilgen jer silkinisinen keıin kóptegen adam habarlasyp, osy shyǵarmamdy oqýǵa surady. Taqyryp oqyrmannyń talǵamyna tatı bilýi kerek, jastarymyz osyny eskerse. Taǵy aıtarym, gazet redaksııasynda osy keshtiń júlgesin úzip almaı dástúrge aınaldyrý qajet», dedi jazýshy Q.Jıenbaı.
«Ádebıettiń aǵysymen ózgeshe tolqyn, jańa býyn keledi, bul zańdylyq. Meniń qýanǵanym, qazaq ádebıetin kóshin súıreıtin jastardyń qalyń shoǵyry ósip keledi. Búgingi ádebı kesh osy sózimdi salmaqtaı túsedi. Ásirese prozaǵa qaraı kóńili qulaıtyn býynnyń qatary kóbeıip kele jatqany janyńdy jadyratady. Bizden keıingi býyn, jas tolqyn jastar qazirgi qazaq qoǵamyna ne kerek degen saýalǵa tatıtyn súbeli shyǵarmalar jazady dep senim bildiremin», dedi jazýshy Asqar Altaı.
Aqyn Dáýletkereı Kápuly búgingi kitaptarynyń tusaýy kesilgen aqyn-jazýshylardyń ózindik soqpaǵy qalyptasqanyna qýanatynyn jetkizdi. Aqyn Tolqyn Qabylsha «ádebıet ardyń isi» ekenin aıqyndaı alyp júrgen zamandastaryna sáttilik tiledi.
Batyrhan Sársenhan pen Jánibek Álıman óleńderimen jıylǵan qaýymdy serpiltse, Baqytbek Qadir men Abaı Aımaǵambettiń áńgimelerinen úzindi oqyǵan Qazaq ulttyq óner ýnıversıtetinde akter mamandyǵy boıynsha bilim alýshy stýdentter de sheberligimen tánti etti.
Aqyn Ularbek Nurǵalym tizgindegen keshte ánshi Sáýlejan Taǵzııa tamasha ánderdi shyrqap kópshilikti serpiltti.
