Foto: senate.parlam.kz
Senat depýtaty talapty óreskel buzyp, josyqsyz qurylys salýshylardan zardap shekkenderdiń basym bóligi Astanada – 1 282 adam, Qaraǵandyda – 961 adam, Aqtóbede – 657, Atyraýda – 631 jáne Almatyda – 360 adam ekenin jetkizdi.
2019-2022 jyldar aralyǵynda elordada problemalyq obektilerdiń qurylysyn aıaqtaýǵa Ulttyq qordan 60 mlrd teńge jáne respýblıkalyq, jergilikti bıýdjetterden 154,6 mlrd teńge bólingenin atap ótti. Osylaısha, memlekettiń qatysýymen elordada 120 problemalyq turǵyn úıdiń qurylysy aıaqtaldy. Alaıda búginde elimizde 7 myńǵa jýyq aldanǵan salymshy bar, onyń 4 myńnan astamy - Astana qalasynyń turǵyny.
«Sońǵy eki jylda quqyq qorǵaý organdary zańsyz qarajat jınaǵany úshin 300-den astam kompanııany ákimshilik jaýapkershilikke tartyp, olarǵa 250 mln teńgege aıyppul salypty. Iаǵnı, orta eseppen alǵanda, bir kompanııaǵa 800 myńnan sál asatyndaı aıyppul salynǵan. Bul degenińiz bir páterdiń 2 sharshy metriniń baǵasy ǵana. Al keltirilgen zalal 30 mlrd teńgeden asty. Aıyppul – 250 mıllıon, zalal 30 mıllıard. Bul paradoks emes pe? Úleskerlerge keltirilgen shyǵyndar kúdiktiler esebinen tolyq óndirilmeı, kópshiligi memleket tarapynan óndirilip jatyr. Osy máseleni eskere otyryp, qurylys kompanııalaryna qoıylatyn talaptar men memlekettik baqylaýdy kúsheıtý qajet. Qurylys kompanııalaryna is qozǵalǵan sátte sol kompanııalardy jarnamalap júrgen túrli blogerler men tanymal tulǵalardyń da jaýapkershiligin arttyrý qajet», dep jazdy G.Shıpovskıh Premer-mınıstrge joldaǵan saýalynda.
