Foto: aqorda_resmi
Prezıdent óz sózinde memlekettik satyp alý, memleket pen jekemenshik seriktestigi, qurylys salasyn retteý júıesin reforma júrgizý ýaqyt kúttirmeıtin sharýa ekenin atap ótti.
«Bul jumys ınvestısııa tartý jáne bıýdjet qarajatyn tıimdi paıdalaný isindegi reformalarmen barynsha úılesip, ony tolyqtyra túsýge tıis.
Qazir Májiliste memlekettik satyp alý týraly zań jobasy qaralyp jatyr. Bul qujatty pysyqtap, jetildirý qajet. Parlament depýtattarynan osyǵan erekshe mán berýdi suraımyn. Eń aldymen, aýdıtorlardyń qyzmetin retteý kerek.
Osy oraıda árkimniń zań normalaryn óz qalaýyna qaraı ıkemdep, túsindirýine jol berýge bolmaıdy. Bul – taýar, jumys jáne qyzmet usynýshylarǵa qoıylatyn talaptarǵa da qatysty másele. Olardyń belgilengen merzimdi buzǵany jáne jumysty sapasyz oryndaǵany úshin jaýapkershiligin kúsheıtý qajet. Munyń, ásirese, qurylys salasy úshin mańyzy zor.
Memlekettik satyp alý týraly jańa zań ERS sharttaryn qoldana otyryp, ınfraqurylym jobalaryn tolyq júzege asyrýǵa múmkindik berýge tıis. Bul rette ERS sharttaryn jasaýǵa daıyndyq sharalarynyń merzimi qysqa bolýǵa tıis. Sonda ákimdikter basymdyq berilgen ári shuǵyl júzege asyrylýǵa tıis jobalardy tezdetedi», dedi Q.Toqaev.
Memleket pen jekemenshiktiń seriktestigin damytý úshin biraz sharýa atqarylǵanyn aıtqan Prezıdent nátıjesi áli de mardymsyz ekenine qynjyldy.
«Qazir mundaı jobalar negizinen áleýmettik salaǵa engizilip jatyr. Bul saladan kóp tabys túspeıtini belgili. Ashyǵyn aıtqanda, biz nysandardyń qurylysyna bólip tóleý arqyly qarjy quıyp otyrmyz. Memleket úshin mundaı tásil, árıne, tıimsiz», dedi Prezıdent.
Aıta ketsek, osy saladaǵy normalar men rásimder jeke bızneske salmaq salady ne bolmasa ınvestorǵa óte tıimdi bolǵanymen, memleketke paıda ákelmeıdi. Bul máseleni nazarǵa alǵan Qasym-Jomart Toqaev teńgerimdi, ıaǵnı balansty saqtaý kerek ekenin, memleket pen ınvestordyń múddesi birdeı eskerilýi qajet ekenin túsindirdi.
«Bizde memleket pen jekemenshik seriktestigi jeke jobalardy bıýdjetten astyrtyn qarjylandyratyn tásilge aınalyp ketti. Memleket pen jekemenshik seriktestigi júıesin qaıta qurýǵa qatysty jumys baıaý júrip jatyr. Ázirge naqty nátıje joq. Úkimet osy máseleni retke keltirý qajet», degen Prezıdent oıdan jańalyq oılap tabýdyń qajeti joq ekenin qatań eskertti.
Memleket basshysy bul sharýany da sozbalańǵa salmaı tez arada sheship, álemniń ozyq tájirıbesin qoldanyp, tıimdi tásilderdi usyna alatyn halyqaralyq uıymdardy tartýdy júktedi.
