2023 jyly prokýratýraǵa azamattar men zańdy tulǵalardan 373 myńnan asa joldanym kelip túsken. Onyń negizgi bóligi, ıaǵnı 158 myńy áleýmettik-ekonomıkalyq saladaǵy máselelerge qatysty. Hattardyń úshten birinen astamy sotqa deıingi tergep-tekserýlerdiń zańdylyǵyna bildirilgen shaǵymdar. Sondaı-aq el azamattary qylmystyq, azamattyq jáne ákimshilik ister boıynsha sot aktilerimen kelispeýshilikterin bildirgen. 171 myńnan asa aryz-shaǵymdy prokýrorlar tikeleı qarasa, qalǵan hattar quzyreti arqyly ýákiletti organdarǵa joldandy.
Jeke qabyldaýlar barysynda prokýrorlar 51 myńnan asa azamatty qabyldady, al árbir úshinshi aryzdy prokýratýra basshylyǵy aryzdanýshylardyń qatysýymen qarady. Nátıjesinde, 48,9 myń aryz berýshiniń quqyǵy qorǵalyp, 5,6 myńnan asa prokýrorlyq qadaǵalaý jáne den qoıý aktileri engizildi.
Qylmystyq úderiske qatysýshylardyń quqyqtary men múddelerin 18,2 myń joldanym boıynsha qorǵaǵany týraly erekshe atap ótken jón. Qylmystyq qýdalaý organdarynyń 2,2 myń zańsyz úderistik sheshimderiniń kúshi joıyldy. Prokýrorlar isterdi obektıvti sheshýge baǵyttalǵan sotqa deıingi tergep-tekserýler boıynsha 3,4 myń nusqaý berdi.
Máselen, V.Soı men Q.Qarabaev alaıaqtyq faktisi boıynsha Astana qalasy ishki ister organdarynyń zańsyz qylmystyq qýdalaýyna ushyradyq dep Bas prokýratýraǵa shaǵymdanǵan. Is materıaldaryn tekserýmen «Bank Sentr Kredıt» AQ jáne «Obektilerdi ońaltý dıreksııasy» JShS aryzdary boıynsha sotqa deıingi tergep-tekserý negizsiz júrgizilgeni anyqtaldy, óıtkeni taraptar arasynda qylmystyq-úderistik tártippen sheshilýge jatpaıtyn azamattyq-quqyqtyq qatynastar týyndaǵan. Osyǵan baılanysty Bas prokýratýra bıyl qańtar aıynda sotqa deıingi tergep-tekserýdi qylmystyq quqyq buzýshylyq quramynyń bolmaýyna baılanysty toqtatty.
Prokýratýra mindetteriniń biri – azamattar men kásipkerlerdiń áleýmettik-ekonomıkalyq saladaǵy quqyqtaryn qorǵaý. Bul baǵytta prokýratýra 10 myń joldanym boıynsha quqyqtar men múddelerdi qalpyna keltirdi.
Máselen, Astana prokýratýrasyna jergilikti kásipker A.Elmuratov habarlasyp, salyq organynyń oǵan qosymsha qun salyǵy boıynsha tirkeý esebine qoıý maqsattary úshin kózdelgen eń tómengi aınalymnan asyp ketýi týraly habarlamany negizsiz jibergenin aıtqan. Kásipkerdiń joldanymyn qaraý nátıjesinde, elordalyq Almaty aýdany prokýratýrasynyń narazylyǵymen 2023 jylǵy jeltoqsanda salyq organynyń zańsyz habarlamasy joıyldy.
