Foto: polisia.kz
«Olardyń krımınaldyq qyzmeti týraly dáleldemelerdi jınaý arqyly qylmystyq toptardyń jetekshileri men belsendi múshelerin qoǵamnan oqshaýlaý jóninde keshendi sharalar qabyldanyp jatyr. Jyl basynan beri uıymdasqan qylmystyq top qurý, oǵan basshylyq etý jáne qatysý boıynsha 15 fakti anyqtalyp, tirkeldi. Ártúrli qylmystar jasaǵany úshin qylmystyq toptardyń 30-dan astam jetekshileri men belsendi músheleri ustaldy. Máselen, 7 aqpanda IIM men UQK qyzmetkerleri Almaty qalasynda quramynda belgili «Aıshýaq-Jantúgel» uıymdasqan qylmystyq tobynyń músheleri bar topty quryqtady. Jedel-tergeý is-sharalarynyń nátıjesinde 14 adam ustaldy. 7 atys jáne travmatıkalyq qarý, 4 granata, 200-den astam oq-dári, esirtki zaty, sondaı-aq basqa da sýyq qarý tárkilendi. Top músheleri kásipkerlerge ózderiniń krımınaldyq «qamqorlyǵyn» kórsete otyryp, olardy bopsalaýmen aınalysqany anyqtaldy. Olar Almaty qalasynyń temir jol vokzaldary aýmaǵynda, sondaı-aq bazarlarynda óz yqpalyn júrgizgeni» jazylǵan.
IIM uıymdasqan qylmysqa qarsy kúres departamentiniń basqarma bastyǵy Qýandyq Alpys kúdiktilerdiń ústinen bopsalaý jáne bas bostandyǵynan zańsyz aıyrý faktileri boıynsha Almaty qalasy PD tergeý basqarmasy birneshe qylmystyq isti tergep jatqanyn aıtty.
«Polısııa kúshimen Stepnogorsk qalasynda osyǵan uqsas ustaý júrgizildi. Jedel jumystyń nátıjesinde qorqytý jáne kúsh kórsetý arqyly qalanyń turǵyndaryn bopsalaýmen aınalysqan jergilikti krımınalıtettiń qatarynan turatyn toptyń joly kesildi», delingen habarlamada.
