Dúnıeni bılep-tóstep alǵan dúleı kúsh tirshilikpen sanaspaıdy. Biraq tirshilik boran soqty eken dep toqtap qalsa, káni. Bir jerde bireýler saparlap jolda kele jatsa, endi bir shalǵaı aýylda aı-kúni tolǵan jas kelindi tolǵaq qysyp, tar qursaqtaǵy náreste keń dúnıeniń esigin qaǵyp jatady. О́mir men ólim arbasqan mundaı qystalań sátterde borannan ozyp, aqtútekten adaspaı jol taýyp kómekke keletin qutqarý qyzmetteriniń erlikke bergisiz eńbegi eresen-aq.
О́ńir tutastaı qar qursaýynda qalǵanda tótenshe jaǵdaı, jol tazartý, polısııa, jedel járdem qyzmetteri úsh kún boıy bel jazbaı arpalysyp júrip óz mindetterin abyroımen atqaryp shyqty. Aqtútek astyndaǵy arpalysta órimdeı jas feldsher qyzdar qarǵa batyp qalǵan jedel-járdem kóligin ıterip shyǵaryp, naýqasqa deıin birneshe shaqyrym ombylap qar keship jaıaý jetken jaǵdaılar boldy. Máselen, 8 aqpandaǵy qarly boranda Severnyı aýylynda turatyn tolǵaǵy jetken júkti áıeldi Arqalyq qalasyna jedel jetkizgen jedel járdem brıgadasyn alaıyq. Severnyı aýylynyń turǵyny Gúlnaz Ryskeldına: «Alaı-túleı boranda Arqalyq perzenthanasyna jetip, aman-esen bosanyp, kishkentaıly bolyp otyrǵanym – Aıdana Naýryzbaı, Mádına Ahmetjanova syndy feldsherler men kólik júrgizýshi Evgenıı Hodostyń arqasy», deıdi. Jas bosanǵan ananyń aıtýynsha, taıaq tastam jerdi kórý muńǵa aınalǵan aqtútek boranda Arqalyqtan shyqqan jedel járdem kóligi Severnyıdyń irgesine jetip qarǵa batyp qalǵan. Aıdana men Mádına dereý kómekke kezekshi kólikti shaqyrtqan soń, júkti áıelge qońyraý shalyp, jaǵdaıdy túsindirip, kóp keshikpeı jetetinderin habarlaǵan. Odan keıin feldsherler ekinshi kóliktiń kelýin kútip turmastan, mejeli mekenjaıǵa qaraı jaıaý tartqan. Bul kezde júkti áıeldiń joldasy da kóliktiń aýyl ishine kire almaıtynyn bilip, jubaıyn kıindirip feldsherlerge qaraı jolǵa shyqqan edi.
«Boran tútep tur. Tolǵaǵym qysyp, shydatpaı barady. Qarsy aldymyzdan shyqqan feldsherlerdi kórgende qýanyp kettik. Olar meni birden ekinshi kólikke otyrǵyzdy. Jaǵdaıymdy surap, birden densaýlyǵymdy tekserip shyqty. Odan keıin kez kelgen jaǵdaıǵa daıyn bolýymdy túsindirip, qaırap, jolda bosanyp qalýǵa daıyn bolý kerek ekenin túsindirdi. Biraq perzenthanaǵa der kezinde jettik. Allanyń qalaýymen qyzdy boldym. Áýeli Allaǵa, odan keıin Mádına men Aıdanaǵa alǵysym sheksiz», deıdi Gúlnaz Ryskeldına.
Oblystyq densaýlyq saqtaý basqarmasynyń málimetinshe, qarly borannyń qursaýyndaǵy úsh kún ishinde «103» qyzmetine 3 819 qońyraý kelip túsken. Jedel járdemge 2 676 adam júgingen. 678 naýqas aman-esen aýrýhanaǵa jetkizilgen.
Tótenshe jaǵdaı qyzmeti men polısııa kúshteri de birneshe kúnge sozylǵan borannyń astynda júrdi. Borannyń saldarynan oblys aýmaǵynda 300-ge jýyq aýyr júk kóligi qar qursaýynda qaldy. Mysaly, bir ǵana «Qostanaı – Qarabutaq» avtojolynyń boıynda 300-den asa júk kóligi men jolaýshy tasymaldaıtyn birneshe avtobýs eki-úsh kún turdy. Denısov, Beıimbet Maılın aýdandary men Lısakov qalasynyń jergilikti atqarýshy organdary qar qursaýynda qalǵandardy jyly jaılarǵa ornalastyryp, tegin ystyq tamaq, aýyzsý jetkizip turdy.
Qostanaı oblysy
