(fotosýretti ShQO Densaýlyq saqtaý basqarmasynyń baspasóz qyzmeti usyndy)
– Bosaný blogymen tyǵyz baılanysta jumys isteı otyryp, biz jańa týǵan nárestelerde neırohırýrgııalyq aqaýlar anyqtalǵan kezde dereý operasııa jasaýǵa tyrysamyz. Mysaly, patologııanyń ártúrli deńgeıleri bar. Ásirese, omyrtqanyń týabitken jaryǵy jıi kezdesedi. Eger buryn gıdrosefalııa dıagnozy úkim sııaqty estilse, qazir bul aýrýmen Ana men bala ortalyǵynyń neırohırýrgteri sátti kúresip júr, – deıdi ShQO Ana men bala ortalyǵynyń neırohırýrg dárigeri Oljas Azanqulov.
Aımaqtaǵy Ana men bala ortalyǵynda Samar aýdanynyń Shubarqaıyń aýylynan kelgen 11 jastaǵy Kamıla Baızaqova sábı kezinen bastap gıdrosefalııa dıagnozymen dıspanserlik esepte tur. Nárestege alǵashqy shýnt eki aıynda qoıylǵan. Dárigerlerdiń aıtýynsha, keıin Kamılanyń aıaǵynda álsizdik paıda bolǵan. Teksere kele MRT nátıjesi julyn jaryǵyn kórsetken. Sóıtip, 2013 jyly sábı kezinde oǵan Astana qalasyndaǵy neırohırýrgııa ortalyǵynda julyn isigine operasııa jasaldy. Jalpy, búginge deıin bes operasııany basynan ótkizipti.
Jyl saıyn Kamıla anasymen birge ShQO-daǵy Ana men bala ortalyǵyna kelip, ventrıkýlo-perıtonealdi shýntty teksertedi, ońaltý kýrsynan ótedi, abzal jandardyń qadaǵalaýynda bolady. Kúni keshe ǵana jetkinshekke hırýrgter taǵy bir operasııa jasady. Qazir pasıent ózin jaqsy sezinedi. Úıge shyǵýǵa daıyndalyp júr. Ana men bala ortalyǵy dárigerleriniń aıtýynsha, ol aýrýhanada bos qarap jatpaıdy. Monshaqtardan ártúrli sýretter kesteleıdi, telefondarǵa arnalǵan bilezikter jasaıdy. Jasaǵan zergerlik buıymdaryn neırohırýrgııa bóliminde emdelip jatqan balalarǵa syılap júr. Kishkentaı pasıent bólimde jatqan qurdastaryna ǵana emes, eresekterge de ómirsheńdiktiń, tózimdiliktiń jáne aqyl-oıdyń úlgisin kórsetti.
– Gıdrosefalııa bolǵan jaǵdaıda jedel medısınalyq kómekke júginý qajet. Aýrýdy kásibı emdeý jáne saýatty ońaltý asqynýlar men múgedektik dárejesin 60%-ǵa deıin tómendetýi múmkin. Shala týǵan sharanalar men julyn jaryǵy bar balalar táýekel tobyna kiredi. Gıdrosefalııa kóbinese úsh aıǵa deıin anyqtalady. Eger osydan 20 jyl buryn gıdrosefalııa dıagnozynan aıyǵyp shyǵý múmkin bolmasa, búginde erte kómek pasıentterdiń 95%-yn qutqarýǵa múmkindik beredi, – deıdi «on saýsaǵynan óner tamǵan» dáriger Oljas Azanqulov.
Aıta keteıik, elimizde joǵaryda atalǵandaı, dıagnoz qoıylǵan naýqastardy emdeý tegin. Barlyq shyǵyn MÁMS qarajaty esebinen jabylady.
Shyǵys Qazaqstan oblysy
