Baqytjan Ertaevpen ótken erlik sabaǵy Keńes Odaǵynyń Batyry, armııa generaly Saǵadat Nurmaǵambetovtiń, Halyq Qaharmany Raqymjan Qoshqarbaevtyń ǵasyrlyq mereıtoılaryna jáne Aýǵanstannan Keńes áskerlerdiń shyǵarylǵanyna 35 jyl tolýyna oraı ótip jatqan is-sharalar aıasynda uıymdastyryldy. Kezdesýge aýǵan jaýyngerleri, qorǵanys isteri jónindegi qalalyq departament ókilderi, Almatydaǵy «Jas ulan» respýblıkalyq mektebiniń jeke quramy qatysty.
Erlik sabaǵy Baýyrjan Momyshuly monýmentine gúl shoqtaryn qoıý rásimimen bastaldy. Mekteptiń akt zalynda general-leıtenant Baqytjan Ertaev ózi áskerde qyzmet etken ártúrli kezeńder týraly aıtyp, halyq qaharmandary ómirbaıanynyń qyzyqty tustarymen bólisti.
Is-shara barysynda mekteptiń tárbıelenýshileri Baqytbek Smaǵuldyń «Men kórgen soǵys» kitabynan sahnalyq kórinis oınady. Sonymen qatar balalar Aýǵan soǵysy jaıly ánder aıtty.
– Mundaı is-sharalar elimizdiń jaýyngerlerine qurmet kórsetý, óskeleń urpaqtyń ortasynda Otanǵa degen súıispenshilik pen jaýapkershilik sııaqty qasıetterdiń artýyna yqpal etý úshin mańyzdy, – dep atap ótti Almaty qalasy qorǵanys isteri jónindegi departamentiniń basshysy, polkovnık Farhat Qurmanǵajınov. «Jas ulan» mektebiniń basshylyǵy tarapynan Baqytjan Ertaevqa Alǵyshat tabys etilgennen keıin tárbıelenýshilerdiń qonaqpen beıresmı suhbaty ótti.
– Otanǵa qyzmet etý úshin, eń aldymen, patrıot bolý kerek. О́zińmen tynymsyz jumys isteý, kásibı sheberlikti arttyrý jáne ýaqyt kelgende Otan aldyndaǵy boryshty abyroımen oryndaý qajet, – dedi Baqytjan Ertaev.
Aıta ketý kerek, Baqytjan Ertaev vzvod komandırinen bastap generalǵa deıingi mansaptyq joldan ótti. Ol egemen Qazaqstannyń Qarýly kúshterin qalyptastyrýǵa, armııanyń qorǵanys qabileti men jaýyngerlik daıyndyǵyn nyǵaıtýǵa mol úles qosty.
