Ań sanaý jumystary jyldyń qaı mezgili bolmasyn, ońaı emes. Qamaýdaǵy mal sııaqty bas-basymen sanap almaıdy. Altaıdyń jyńǵyl-jyńǵylyn, saı-salasyn atpen, bolmasa jaıaý aralap, izimen sanaıdy. Elik-maral úıirimen kezdesse, sýretke túsirip, tirkep alady. Fototuzaqtyń kómegine de júginedi. Biraq ol qurylǵy ań bitkendi túsirip úlgermesi anyq.
– Ulttyq park aýmaǵyndaǵy ań-qustardy jyl saıyn tizimdep, sanyn shyǵaryp otyramyz. Sonymen qatar tuıaqty janýarlardy azyqtandyrý jumystaryn da júrgizip jatyrmyz. Sebebi qar jyldaǵydan qalyń, – deıdi janýarlar álemin qorǵaý jáne óndirý bóliminiń basshysy Erik Qasymov.
Altaıda qys uzaq ári qatal. Qatal qysta túz taǵysy júrgen soqpaqpen sońdaryna túse iz sanap júrgen ınspektorlardyń eńbegi eńbek-aq. Qysqy sanaq esepterine qarasaq, Katonqaraǵaı memlekettik ulttyq tabıǵı parkiniń aýmaǵynda 120 bulan, 400 bastaı maral, 2 200 mólsherinde elik bar eken.
Esterińizge sala keteıik, ulttyq park aýmaǵynda ańnyń qaı túri bolmasyn, aýlaýǵa qatań tyıym salynǵan. Sondyqtan da shyǵar, qasqyr kóbeıgen. Aýyl mańyn torýyldap júretin ıt-qus malshylardyń mazasyn qashyrǵany da jáne ras. Malmen jan baqqan aýyl turǵyndarynyń aıtýynsha, odan qutylýdyń jalǵyz joly bar: zań aıasynda ańshylarǵa qasqyr atýǵa ruqsat berý qajet.
Shyǵys Qazaqstan oblysy,
Katonqaraǵaı aýdany
