Top tóraǵasy Serik Shaıdarov Memleket basshysy Úkimettiń jaqynda ótken keńeıtilgen otyrysynda agroónerkásip keshenin damytýdyń mańyzdylyǵyn atap ótip, nazar aýdarylýǵa tıis birqatar problemalardy qarastyrǵandaryn jetkizdi.
«Prezıdent aýyl sharýashylyǵyndaǵy eńbek ónimdiligin arttyrý, otandyq taýar óndirýshini qorǵaý, onyń ishinde eksport pen ımportty retteý, memlekettik qoldaýdyń tıimdiligin qamtamasyz etý, aýyl sharýashylyǵy tehnıkasyn jańartý jáne t.b. máselelerdi sheshý mindetin alǵa qoıǵan bolatyn. Osy problemalardy sheshý ishki naryqty azyq-túlikpen qanyqtyrý esebinen eksporttyq áleýetti arttyrýǵa jáne azyq-túlik qaýipsizdigin qamtamasyz etýge múmkindik beredi», dedi senator.
Depýtat Ernur Áıtkenov halyqaralyq arenadaǵy turaqsyz jaǵdaı, azyq-túlik tapshylyǵy problemalary ekonomıkanyń damý qarqynyna jáne halyqtyń ál-aýqatyna keri áserin tıgizetinin atap ótti.
«Elimiz ımport ónimge táýeldi bolyp otyr, bul azyq-túlik qaýipsizdigine ǵana emes, ekonomıkalyq qaýipsizdikke de naqty qaýip tóndiredi. Tıimdi azyq-túlik qaýipsizdiginiń negizgi sharty aýyl sharýashylyǵynyń turaqty damýyn qamtamasyz etý bolyp tabylatyny belgili. Osy faktorlardyń barlyǵy agroónerkásip keshenin reformalaýdy jáne azyq-túlikpen qamtamasyz etýdiń ulttyq deńgeıdegi jańa tetikterin ázirleýdi talap etedi», dedi depýtat.
Depýtattar otyrys barysynda saýda jáne ıntegrasııa, aýyl sharýashylyǵy, ulttyq ekonomıka mınıstrlikteri, oblys ákimdigi ókilderiniń, sondaı-aq qoǵamdyq uıymdar men sharýa qojalyqtary ókilderiniń baıandamalaryn tyńdady.
Senator Serik Shaıdarov kezdesýdi qorytyndylaı kelip, otyrys barysynda aıtylǵan usynystar zerdelenetinin jáne senatorlardyń zań shyǵarý qyzmeti barysynda paıdalanylatynyn atap ótti.
