– Lara, eń aldymen mýzyka álemindegi aıaq alysyń jaıynda aıtyp berseńiz. Qansha jastan án aıta bastadyńyz?
– Meniń jasym 23-te. Qazirgi ýaqytta joǵary oqý ornynda menedjment fakýltetinde bilim alyp jatyrmyn. Sonymen birge mýzykamen, ıaǵnı án aıtýmen de aınalysamyn. Meniń anam – ánshi. Sol kisige eliktep, 3 jasymnan án aıta bastadym.
– Dımashqa deıin Qazaqstan týraly estidińiz be?
– Iá, estidim. Sizderdiń elderińiz jaıynda keı málimetti bilgenimmen, men ony kóz aldyma basqasha elestetetinmin. Keıin jaqyn tanysa kele Qazaqstannyń qandaı ádemi ári tańǵajaıyp el ekenine kózim jetti.
– Qatelespesem, qazaq mýzykasyna degen qyzyǵýshylyǵyńyz Dımashtan bastaldy. Onyń ánderin alǵash ret qashan tyńdap edińiz?
– Iá, ras aıtasyz, bári Dımashtan bastaldy. Alǵash ret onyń «I am singer» jobasynda «All by myself» ánin oryndaǵanyn estidim. YouTube arnasynda sol ándi tamashalaǵanda qatty qaıran qaldym. «Adam balasynda mundaı daýys bolýy múmkin be?» degen oı keldi. Sheksiz talant. Men Dımashtyń únine uqsaıtyn daýysty eshýaqytta kezdestirgen emespin. Tipti teńdessiz tuńǵıyq desem bolady. Keıin onyń jeke ánderin tyńdaı kele, qazaq tiline ǵashyq boldym.
– Sol kezden bastap birneshe qazaq ánin oryndap, ónersúıer tyńdarmanymyzdyń yqylasyna bólendiń. Eki ret Qazaqstanǵa kelip, sahnada án aıttyńyz. Elimiz, qazaq halqy unady ma?
– Iá, men elderińizde eki ret boldym. Qazaq – naǵyz qonaqjaı halyq. Qazaqtar eti tiri ári júregi keń adamdar ekenin baıqadym. Qazaqstannyń taýlary da, tabıǵaty da ǵajap. Bir barǵannan keıin qaıta-qaıta barǵyń keledi. Al qazaq ánderi meniń júregimdi jaýlap aldy. Olardyń ózine tán ereksheligi bar.
– Máselen, qandaı erekshelik baıqadyńyz? Basqa halyqtardyń ánderine, sonyń ishinde portýgal ánderine uqsamaıtyn tustary bar ma?
– Qazaq ánderiniń qurylymy basqa halyqtardan, mysaly portýgal ánderinen qatty erekshelenedi. Mýzykalyq aspaptardyń qoldanysynda da aıyrmashylyqtar bar. Kompozısııasy basqasha. Qazaq ánderinde emosııanyń kóptigi sondaı, tipti onyń sózin túsinbeseń de, aıtylyp jatqan oıdy jan-dúnıeńmen sezinesiń. Biz, portýgalııalyqtar da, emosııalyq ánderdi jaqsy kóremiz. Osy jaǵynan eki halyq bir-birine uqsas dep aıta alamyn.
– Al qazaqsha án oryndaý, onyń sózderin aıtý qıyn bolmady ma?
– Shyn máninde óte qıyn. Adamdardyń kómegimen ony da úırenip jatyrmyn, biraq qıyndaý ekeni ras. О́ıtkeni qazaq tiliniń dybystary bizdiń tilimizden qatty erekshelenedi. Degenmen ýaqyt óte kele oǵan da jattyǵamyn dep úmittenemin.
– Qazaqstanda bolyp, qazaqtarmen jaqyn tanystyńyz. Mádenıetimizde, dilimizde, dástúrimizde sizdermen uqsastyqtarymyz bar ma?
– Eki halyqqa da ortaq qundylyqtar bar. Mysaly, adamdarǵa kómektesý jáne iltıpatty qarym-qatynas jasaý jaǵynan uqsaspyz. Biz de sizder sekildi basqa elden kelgen qonaqtarǵa jyly qabaq tanytyp qabyldaýdy, olarǵa bar jyly-jumsaǵymyzdy usynǵandy jaqsy kóremiz. Biraq mentalıtetimiz ártúrli. Dástúrimiz de ózgeshe.
– Aldaǵy ýaqytta taǵy qandaı qazaqsha ánge kaver jasaý oıyńyzda bar? Ándi tańdadyńyz ba?
– Men keleshekte de kóp qazaqsha án oryndaǵym keledi. Ázirge kezekti ándi tańdaý ústindemin. Jaqyn kúnderi ony da áleýmettik jelide bólisemin.
– Jýyrda ınstagramda qazaq tilinde jańa án jazǵyń keletinin aıttyńyz. Bul baǵytta qandaı jańalyqtaryńyz bar?
– Iá, men qazaqsha jáne portýgalsha án jazsam dep júrmin. Ol úshin Qazaqstannan ánshi shaqyryp, dýet bolyp aıtý oıymda bar.
– Alǵa qoıǵan josparlaryńyzben bólise otyrsańyz. Ásirese Qazaqstanmen baılanysty qandaı jobalaryńyz bar?
– Qazir bir ǵana maqsatym – mýzykamen shuǵyldaný, án aıtý. Taǵy da Qazaqstanǵa baryp án aıtsam deımin.
– Áńgimeńizge rahmet!
Áńgimelesken –
Eskendir ZULQARNAI,
«Egemen Qazaqstan»
