foto: ult.kz
«Qazaqstan Respýblıkasynyń keıbir zańnamalyq aktilerine áıelderdiń quqyqtaryn jáne balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zań jobasyna Májilis depýtattary bastamashylyq jasady.
«Zań jobasy balalardyń qaýipsizdigin qamtamasyz etý, áıelder men balalarǵa qatysty qylmystardyń aldyn alý jáne jolyn kesý jónindegi memlekettik saıasattyń quqyqtyq, ekonomıkalyq, áleýmettik jáne uıymdastyrýshylyq negizderin jetildirýge baǵyttalǵan. Atap aıtqanda, zań jobasynda densaýlyqqa qasaqana jeńil zııan keltirýge, uryp-soǵýǵa, 16 jasqa tolmaǵandardy jynystyq qýdalaýǵa, óz-ózine qol jumsaýdy nasıhattaýǵa jáne basqalarǵa baǵyttalǵan áreketterdi qylmystyq jaýapkershilikke tartý qarastyrylǵan», dedi depýtat Juldyz Súleımenova.
Onyń aıtýynsha, zań jobasymen jumys barysynda depýtattar mynalarǵa baǵyttalǵan birqatar túzetýler engizdi:
- Otbasyn qoldaý ortalyqtarynyń turmystyq zorlyq-zombylyq belgileri bar adamdarǵa qoldaý kórsetý, olarǵa ýaqytsha turý múmkindigin berý bóliginde quzyretterin naqtylaý;
- Jeńil zııan keltirgeni úshin jáne qylmystyq quqyq buzýshylyq jasaǵan adamdardy ustaý tártibin retteý;
- Qoǵamdyq kólikten májbúrlep túsirýge tyıym salynatyn balalardyń (16 jasqa deıingi tulǵalardyń) jasyn anyqtaý;
- 16 jasqa tolmaǵan adamdardy jynystyq qýdalaý úshin qylmystyq jaýapkershilikti kúsheıtý;
- Tatýlasýyna baılanysty sottalǵan nemese qylmystyq jaýaptylyqtan bosatylǵan adamdarǵa sot belgilegen arnaıy talaptardy qoldaný sharalaryn túsindirý.
«Úkimettiń usynysymen oblystaǵy, respýblıkalyq mańyzy bar qaladaǵy jáne astanadaǵy bala quqyqtary jónindegi ýákilderdiń qyzmetin retteýge qatysty túzetýler engizildi. Sonymen qatar depýtattar normalardy quqyqtyq tehnıkaǵa sáıkestendirýge baǵyttalǵan redaksııalyq túzetýler men tolyqtyrýlar engizdi, bul zań jobasynyń mazmunyn sapalyq jaǵynan jaqsartty», dep atap ótti Juldyz Súleımenova.
Budan bólek, depýtat Elnur Beısembaevtyń pedofılderdi hırýrgııalyq kastrasııalaý týraly rezonansty usynysy palatadan qoldaý tappady.
