Májilis spıkeri, «Amanat» tóraǵasy Erlan Qoshanov aýyldy damytý máselesi Memleket basshysynyń erekshe baqylaýynda ekenin atap ótti. Osy oraıda, partııa qoǵamda keń qoldaý tapqan «Aýyl amanaty» jáne «Jer amanaty» syndy eki joba ázirledi. «Aýyl amanaty» – aýyldy damytýdyń jańa draıveri. Jalpy alǵanda, 2029 jylǵa qaraı joba aıasynda 1 mln aýyl turǵynyn qamtyp, 350 myń jańa jumys ornyn ashý josparlanyp otyr. Alǵash ret el tarıhynda atalǵan maqsatqa 1 trıllıon teńge kóleminde qomaqty qarajat bólindi.
«Aýyl amanaty» – Prezıdenttiń saılaýaldy baǵdarlamasyna engizilgen biregeı joba. Jobada aýyl turǵyndarynyń turmysyn jaqsartýdyń naqty ári túsinikti tetikteri qarastyrylǵan. Eń bastysy, qarajaty tolyq sheshilgen. Bir jyldyń ishinde jobanyń tıimdiligin kórip otyrmyz. Barlyq memlekettik organ men ákimdik «Aýyl amanaty» jobasyn sapaly júzege asyrýǵa tıis. Negizgi mindet te osy bolýy kerek», dedi ol.
Premer-mınıstrdiń orynbasary Tamara Dúısenova «Aýyl amanaty» jobasy aıasynda jumyspen qamtylǵan azamattar sanyn arttyrýǵa arnalǵan naqty josparmen bólisti. Al Aýyl sharýashylyǵy mınıstri Aıdarbek Saparov fraksııa múshelerin jobanyń negizgi kórsetkishteri týraly habardar etti. Otyrys barysynda beınekonferensııa rejiminde birqatar óńirdiń ókilderi sóz alyp, jobany jergilikti jerde júzege asyrý máselesine qatysty pikir bildirdi.
Talqylaý barysynda Májilis spıkeri óńirler arasyndaǵy qarjylyq teńgerimsizdikke nazar aýdardy. Byltyr jalpy nesıe somasynyń 43,9 mlrd teńgesi Jambyl jáne Túrkistan oblystaryna berildi. Alaıda nebári 1 mıllıard teńge alǵan aımaqtar da bar. Sondaı-aq Erlan Qoshanov Úkimet iri aýyl sharýashylyǵy kooperatıvterin qurýǵa tıisti kóńil bólmeıtinin atap ótti. Partııa janyndaǵy jobalyq keńse byltyr aýyl sharýashylyǵyndaǵy jekelegen salalardyń ekonomıkalyq baǵdary men damý áleýetin anyqtaý úshin 166 aýdanda, 16 shaǵyn qala men 2 260 aýyldyq okrýgte skrınıng júrgizgenin eske saldy.
«Bolashaqta barlyq kem-ketikti eskerý qajet. Josparlanǵan kórsetkishterge qol jetkizý úshin aldaǵy kezeńde keminde jyl saıyn 50 myń jumys ornyn ashyp otyrýǵa tıispiz. Qaǵaz betindegi ádemi sıfrlardyń qajeti joq dep sanaımyn. Bastysy – jumyssyz aýyl turǵyndaryn turaqty eńbekpen qamtý», dedi Erlan Qoshanov.
Jıyndy qorytyndylaǵan partııa tóraǵasy joba aıasynda nesıe berýdi sıfrlandyrý úderisin jedeldetýdi, mal satyp alý jáne tehnıkamen qamtamasyz etý máselelerin pysyqtaýdy, statıstıka derekterin biryńǵaı standartqa keltirýdi, sondaı-aq aýqymdy túsindirý jumysyn júrgizýdi tapsyrdy. «Aýyl amanaty» jobasyn júzege asyrý barysy partııa fraksııasynyń erekshe baqylaýynda bolady.
Is-shara aıasynda Aýyl sharýashylyǵy mınıstrligi ázirlegen «Aýyl amanaty» aqparattyq júıesi tanystyryldy. Platforma «Aýyl amanaty» baǵdarlamasyna onlaın rejimde ótinish berýge jáne ol ótinishtiń jaı-kúıin baqylaýǵa múmkindik beredi. Búginde platforma qanatqaqty rejimde jumys isteıdi. Bıyl shildede platforma tolyq iske qosylady. Sondaı-aq fraksııa músheleri «Aýyl amanaty» jobasy aıasynda óndirilgen aýyl sharýashylyǵy ónimderimen tanysty.
