Foto: elements.envato.com
Komıtet tóraǵasy Sultanbek Mákejanov kezdesýde 2023 jylǵy naýryzdan bastap jumys istep kele jatqan «Qazaqstan Respýblıkasy azamattarynyń tólem qabilettiligin qalpyna keltirý jáne bankrottyǵy týraly» zań óz qaryzdary boıynsha esep aıyrysa almaıtyn azamattardyń tólem qabilettiligin qalpyna keltirýge baǵyttalǵanyn atap ótti. Alaıda rásimder barysynda azamattarǵa berilgen múmkindikterdi paıdalanýǵa kedergi keltiretin kemshilikter bar.
«Zańda sottan tys jáne sot arqyly bankrot bolý, sondaı-aq tólem qabilettiligin qalpyna keltirý rásimderi kózdelgen. Bul úsh rásimge boryshkerdiń ózi bastap kirisýge tıis. Biraq tájirıbe kórsetip otyrǵandaı, bul rásimderde azamattardyń tólem qabilettiligi men bankrottyǵyn qalpyna keltirýge tolyq múmkindik bermeıtin belgili bir kemshilikter bar. Oǵan nesıe berýshiler men kollektorlardyń boryshker týraly nesıe bıýrosyna bergen ústirt derekteri negizgi sebep bolyp tur. «Kredıtorlar tiziminde keıbir qarjy uıymdarynyń bolmaýy, sondaı-aq rásimderdi qoldaný týraly ótinish týraly kredıtorlardy habardar etý merziminiń tym sholaqtyǵy da bar», dedi Sultanbek Mákejanov.
Jıynda Qarjy mınıstrliginiń ókili Qaırat Mııatov tólem qabilettiligin qalpyna keltirý rásimderi týraly aıtty. Máselen, sottan tys bankrottyq rásiminde 9 841 azamat 19,8 mlrd teńgeden astam borysh somasy boıynsha bankrot dep tanyldy, sot arqyly bankrot bolý rásimin qoldaný úshin sotqa 2 myńǵa jýyq azamat júgindi, al 4 azamatqa qatysty tólem qabilettiligin qalpyna keltirý rásimi qoldanyldy.
Sonymen qatar is-sharaǵa Ádilet mınıstrligi, Sot ákimshiligi, Qarjy naryǵyn retteý jáne damytý agenttigi, sondaı-aq «Qazaqstan qarjygerleri qaýymdastyǵy», «Boryshkerlerdiń quqyqtaryn qorǵaý qaýymdastyǵy» zańdy tulǵalar birlestiginiń ókilderi qatysty.
