Salada atqarylyp jatqan jumystar týraly Eńbek jáne halyqty áleýmettik qorǵaý mınıstriniń orynbasary Oljas Ordabaev baıandady. Búginde barlyq memlekettik organdar janynan 44 salalyq keńes qurylǵan. Olardyń aldynda naryqqa qajetti mamandyqtar tizimin qurý mindeti tur.
Qazir mamandyqtarǵa baılanysty kásibı standarttardy bekitý boıynsha jumys qyzý júrip jatyr. Qoldanystaǵy 219 standart ózektendirilip, jańadan 135-i daıyndaldy. Taǵy 130-y qaralyp jatyr. Eńbek jáne halyqty áleýmettik qorǵaý vıse-mınıstri bul isti jedeldetý qajettigine nazar aýdardy. Atalǵan kásibı standarttar biliktilik pen eńbekaqy taǵaıyndaý júıesin retke keltirýi kerek.
Qazirgi ýaqytta biliktilik anyqtamasy men kásibı standarttar qatar qoldanylyp keledi. 2030 jyldan bastap eńbek naryǵynda tek kásibı standarttar paıdalanylmaq. Bolashaq mamandardy daıyndaıtyn bilim berý uıymdary oqý baǵdarlamalaryn kásibı standarttarǵa sáıkestendirýi qajet.
Bul úrdisti sıfrlandyrý «Career Enbek» platformasy arqyly júzege asyrylmaq. Al túlekterdiń meńgergen bilimin táýelsiz sertıfıkattaý ortalyqtary baǵalaıdy. Osylaısha, sapaly kadr daıyndaý isin jetildirý qolǵa alynady. Eńbek jáne halyqty áleýmettik qorǵaý mınıstrligi janynan qurylǵan Biliktilik jónindegi ulttyq organ atalǵan jumysqa tolyq jetekshilik etedi jáne súıemeldeıdi.
Otyrys barysynda Kólik, Sıfrlyq damý, ınnovasııa jáne aeroǵarysh ónerkásibi, Qarjy, Sý resýrstary jáne ırrıgasııa mınıstrlikteriniń kásibı standarttar qurý jáne salaǵa qajet mamandardy daıyndaý máseleleri talqylandy.
Vıse-premer ulttyq biliktilikti kóterý jolynda standarttardyń sanyna emes, sapasyna basa mán berý kerektigin erekshe atap ótti.
«Bul baǵytta nátıjeli jumys isteý úshin tıisti zań qabyldandy. Barlyǵy ony oryndaýǵa tıis. Ekonomıka, eńbek naryǵy bizden sapaly, bilikti maman daıarlaýdy talap etip otyr. Biz oǵan qanshalyqty daıynbyz? Sondyqtan resmı sharalardan arylyp, naqty iske kirisý qajet. Standarttardy ázirleý – bul jumystyń tek basy ǵana. Soǵan saı oqý baǵdarlamasyn ózektendirý, eńbek naryǵy suranysyn udaıy qadaǵalap, ony qanaǵattandyrý úshin jedel shara qabyldaý qajet», dep atap ótti Tamara Dúısenova.
Aldaǵy ýaqytta Kásibı biliktilik jónindegi ulttyq keńes aıasynda ár mınıstrliktiń atqarǵan sharalary jekeleı qarastyrylmaq.
