Úkimet basshysy Pavlodar munaı-hımııa zaýytyna baryp, onyń qazirgi jumysymen jáne óndiristi odan ári jańǵyrtý josparlarymen tanysty. Basym jobalardyń biri – tehnologııalyq qondyrǵylar jumysynyń toqtaýsyz jóndeýaralyq kezeńine kóshý.
Búgingi tańda PMHZ jylyna shamamen 6 mln tonna munaı óńdeıdi. Shyǵarylatyn ónimderdiń ishinde avtomobıl benzıniniń ártúrli markalary, dızel otyny, mazýt, bıtým, kommýnaldyq-turmystyq gazdar jáne t.b. bar.
Oljas Bektenovtiń aıtýynsha, Memleket basshysy Qasym-Jomart Toqaev ishki naryqty otynmen qamtamasyz etý boıynsha Úkimet aldyna naqty mindetter qoıdy. Osyǵan baılanysty munaı óńdeý zaýyttary munaı ónimderiniń búkil jelisi boıynsha óndiris kólemin ulǵaıtý úshin barlyq sharalar keshenin iske asyrýy qajet.
Otandyq ekonomıkany damytý úshin jol qurylysynyń mańyzyn eskere otyryp, PMHZ-da bıtým óndiretin peshtiń qurylysy aıaqtaldy, bul onyń óndirisin 15%-ǵa arttyrýǵa múmkindik berdi.
Premer-mınıstr zaýyt basshylyǵyna jumys qarqynyn arttyrý qajet ekenin, bul rette memleket tarapynan qoldaý kórsetiletinin atap ótti.
Jalpy ótken jyldyń qorytyndysy boıynsha «QazMunaıGaz» kompanııasynyń MО́Z-inde qaıta óńdeý kólemi 20%-ǵa – jylyna 14,2 mln tonnadan 16,6 mln tonnaǵa deıin ulǵaıdy. Munaıdy óńdeý tereńdigi rekordtyq 86%-ǵa jetti, al jeńil munaı ónimderin shyǵarý 72%-ǵa deıin ósti. Avtomobıl benzınderi óndirisin 80%-ǵa jáne dızel otyny óndirisin 30%-ǵa ulǵaıtý esebinen ishki naryqtyń qajettiligi tolyǵymen qamtamasyz etildi.
«Bizdiń aldymyzda qaıta óńdeý tereńdigin odan ári arttyrý mindetteri tur. Atap aıtqanda, PMHZ-da dızel otynyn gıdrotazartý jobasy iske asyrylyp jatyr, ol kásiporynǵa -38 gradýsta qatatyn 160 myń tonnaǵa jýyq dızel shyǵarýǵa múmkindik beredi. Otynnyń bul túri respýblıkanyń soltústik aımaqtarynda erekshe suranysqa ıe», dedi QMG basqarma tóraǵasy Maǵzum Myrzaǵalıev.
Sonymen qatar Úkimet basshysy usaqtalǵan polıpropılen jáne basqa da polımer buıymdaryn shyǵaratyn «Neftehım LTD» kásipornynyń jumysymen tanysty. Munda PMHZ-dan jetkiziletin suıytylǵan munaı gazyn óńdeýden bastap daıyn ónimge deıin óndiristiń tolyq sıkli júzege asyryldy. О́z kezeginde ol ishki naryqta, sondaı-aq Qyrǵyzstanda, Reseıde, Tájikstanda jáne О́zbekstanda joǵary suranysqa ıe.
Oljas Bektenov Pavlodar oblysynda munaı-hımııa klasterin damytý úshin barlyq jaǵdaı jasalǵanyn atap ótti. Atap aıtqanda, «Neftehım LTD» zaýyty polıpropılen ónimderin ımporttaý máselesin sheship qana qoımaı, sondaı-aq otynǵa qospa túrinde eksporttalatyn jańa baǵytty ıgerdi.
Úkimet basshysy Energetıka mınıstrligine ári qaraı óndiristi ulǵaıtý úshin kásiporyndy shıkizatpen qamtamasyz etý máselesin muqııat pysyqtaýdy tapsyrdy.
