- Bul sózimizge eldiń ishki ister salasynda «Altyn alqa» ıegeri atanǵan polısııa qyzmetkerleriniń bolýy dálel. Solardyń biri – qoǵam tynyshtyǵyn saqtaýǵa ózindik úlesin qosyp júrgen názik jan Gúljan Quralbekova. Ol ishki ister salasyndaǵy alǵashqy qyzmet jolyn ıývenaldy polısııa tobynyń kámeletke tolmaǵandar isteri jónindegi ınspektory bolyp bastaǵan.
Jumysyna jaýapty polıseı 2004 jyly Túrkistan oblystyq Polısııa departamentine qarasty kóshi-qon polısııasynyń ınspektor laýazymyna taǵaıyndalady. Sodan beri kóshi-qon qyzmetiniń turaqty damýyna atsalysyp júrgen bilikti qyzmetker. Degenmen onyń eń basty jetistigi – el demografııasynyń jaqsarýyna qosqan zor úlesi.
Gúljan Quralbekova – ıyǵyna maıor shenin, al moınyna «Altyn alqa» taqqan 8 perzenttiń anasy. Onyń 2-eýi ul, 6-aýy qyz bala. «Áıeldiń qyryq jany bar» degen babalar sózimen tolyqtaı kelisemin. Áıelder qaýymy bar qıyndyqqa shydaıdy, olardyń qolynan bári keledi. Ana adamdy ómirge ákeledi de, ony ósirip, durys tárbıe berip jetildiredi jáne el tutqasyn ustar azamat bolýyna da úlesin aıamaıdy. Otbasy men qyzmetti qatar alyp júrý áıeldiń qyryq jandy ekenin kórsetse kerek. Meniń de qyzmetime qoldaý bildirip júrgen ekinshi anamdaı bolǵan eneme jáne asyl jaryma alǵysym sheksiz», deıdi keıipkerimiz.
Jalpy, eldiń ońtústik óńiri baıaǵydan kópbalaly analardyń otany desek, artyq aıtqandyq emes. Qazirgi statıstıka kórsetkishteri de sony rastaıdy. Elimizdiń Túrkistan jáne Mańǵystaý oblystarynda týý kórsetkishi eń joǵary. Ishki ister salasynda qyzmet etetin názik jandar arasynda da bir qolymen álemdi, ekinshi qolymen besikti jıi terbetetin áıelder qatary az emes. Bizdiń kelesi keıipkerimiz de osy óńirdegi Ordabasy aýdanynda polısııa qyzmetkeri bolyp isteıdi.
- Aýdandyq polısııa basqarmasynyń krımınalıst mamany Ińkár Rashıdqyzy 7 balany ómirge ákelgen. Onyń ishinde eki ret egizdi dúnıege ákelgen. Ol da – ıyǵyna «maıor» shenimen qatar moınyna «Altyn alqa» taqqan batyr ana. Jumysta krımınalıstik mindetimen qosa, otbasynda ata men ene aldyndaǵy kelindik qyzmetin qaltqysyz atqaryp júr. Bir sózben aıtqanda, «qazaq áıeli» deıtin mártebeli atqa laıyq, kópke úlgi retinde kórsetýge bolatyn jan.
Qoǵamnyń qaýipsizdigin qamtamasyz etip, azamattardyń tynyshtyǵyn kúzetýdiń mańyzyn tereń uǵynyp, óz qyzmetin jaýapkershilikpen atqaryp júrgen Ińkár Rashıdqyzy áıelder qandaı qıyndyqty bolsa da kóteretinin, otbasy qamy men jumys babyn qatar alyp júrý ózine aýyrtpalyq ákelmeıtinin aıtady.
- Polısııa qatarynda kópbalaly ana atanǵan názik jandardan bólek, ózi qaramaǵyna alǵan ýchaskedegi esepke qoıylǵan barsha balaǵa ekinshi ana bolyp júrgen tártip saqshylary da az emes. Bul jerde áńgime ıývenaldy polısııa jaıynda bolyp otyr. Bul laýazymdaǵy tártip saqshysy ózine qarasty ýchaskedegi barlyq kámeletke tolmaǵan balanyń ómiri men qaýipsizdigine jaýapty. Sol aýmaqtaǵy árbir balany jaqsy tanıdy jáne árqaısysynyń jaǵdaıyn jetik biledi. Qaraǵandy oblystyq PD Jergilikti polısııa qyzmeti basqarmasynyń aıryqsha tapsyrmalar jónindegi aǵa ınspektory Ásel Omarova óz qyzmeti jaıynda aıtyp berdi.
– Qaraǵandy oblysynyń ıývenaldy polısııasynda 145 ınspektor eńbek etedi. Olar ózine qarasty ýchaskeniń ekinshi anasy sanalady, tipti esepte turǵan kóp bala úshin ana ornyna ana bolyp júr. Qıyn jaǵdaıǵa tap bolǵan balanyń árbir emosııasyn óz júreginen ótkizedi. Jasóspirimniń alǵashqy mahabbat sezimin de birge basynan keshedi. Olardyń jetken jetistikterine, alǵan jaqsy baǵalaryna birge qýanady. Bizdiń ınspektorlarymyz bala tárbıesin qoldan shyǵaryp alǵan analarǵa keńesshi bolyp keledi. Biz úshin bóten bala degen joq, bári de óz balamyzdaı qymbat, – deıdi polısııa podpolkovnıgi.
Onyń aıtýynsha, búginde oblysta 300 kámeletke tolmaǵan bala men 500-den astam ata-ana esepte tur. Olardyń taǵdyry árqıly, árqaısysy ómirdiń qıyn kezeńin de árqalaı ótkizip jatyr. Bireýleri polısııa qyzmetkerleriniń kómegimen qıyndyqtaryn jeńip, aıaǵyna nyq tursa, basqalary synaqtan súrinip jatady. Biraq ıývenaldy polısııa ınspektorlary olardy eshqashan nazardan tys qaldyrmaı, kómegin aıamaı júredi.
– Esepke alynǵan kontıngentpen profılaktıkalyq jumys júrgizýmen qatar jyl basynan beri biz 1000-nan asa ákimshilik quqyq buzýshylyqty anyqtap, kámeletke tolmaǵandardy beıimdeý ortalyǵyna 31 balany ornalastyrdyq, – deıdi Á.Omarova.
Iývenaldy polısııa ınspektorlarynyń qyzmeti shynymen jan-jaqty ári kúrdeli. Keıde jasóspirim úıine ýaqtyly oralmaı qalsa da, oblystyń búkil garnızony aıaǵynan tik turyp, eriktiler shaqyrylady, barlyǵyn qosqanda 3 myńdaı adam álgi balany izdeýge kirisedi. Áseldiń aıtýynsha, birde jas bala ata-anasyna eskertpeı dostarynyń úıinde biraz ýaqyt otyryp qalǵan, telefony óshken. Ata-anasynyń dabyl qaǵýymen polıseıler ony joǵalyp ketken dep eseptep, izdeýge kirisken. Bir jyldyń ishinde oblysta osyndaı 19 oqıǵa tirkelipti.
Mine, bireýge ana, bireýge jar, endi bireýge áriptes bolyp júrgen áıelder qaýymynyń halyqaralyq merekesi de kelip jetti. Degenmen qandaı meıram bolsyn, olar úıinde qarap otyrmaı, árdaıym antyna adaldyq tanytyp, qoǵam tynyshtyǵyna qulaǵy túrik júredi. Polısııa qyzmetiniń syıly da qurmetti bolýynyń da sebebi osynda bolsa kerek.
