Atalǵan eki tomdyqta ultymyzdyń degdar tulǵalary Abaı men Áýezovtiń shyǵarmashylyǵyndaǵy tyń dúnıeler oqyrman nazaryna usynylyp otyr. Birinshi tomǵa Muhtar Áýezovtiń Ońtústikke sapary men Shymkent qalasynda jerlengen Abaı urpaqtaryna qatysty jańa derekter toptastyrylǵan. Al 2-tomǵa Abaı shyǵarmalaryndaǵy tekstologııalyq-termınologııalyq máseleler men Múrseıit, Turaǵul, Kákitaı haqyndaǵy maǵlumattar endi. Kitaptyń jańashyldyǵy – Abaı Qunanbaıulynyń qarasózderi, óleńderi men aýdarmalary túpnusqa qoljazbalarmen qaıta salystyrylyp, onyń transkrıpsııasy jasalyp, arnaıy túsinikteme berilgen.
Kórisý kúnimen tuspa-tus kelgen kitaptyń tusaýkeserine arnalǵan saltanatty is-sharany M.Áýezov atyndaǵy OQÝ basqarma tóraǵasy-rektor mindetin ýaqytsha atqarýshy Qaırat Nurmanbetov ashyp, ǵylymı-zertteý ortalyǵynyń jumysyna sholý jasady, eki tomdyq jańa kitap ǵalymdardyń 5 jyldyq zertteýleriniń nátıjesi ekendigin atap ótti. Is-sharaǵa qatysqan «Amanat» partııasy Shymkent qalalyq fılıalynyń atqarýshy hatshysy Janar Bektaeva, akademık Darııa Qojamjarova «Áýezov hám Abaı» kitaby týraly pikirlerin bildirdi. Jýrnalıst, oblystyq máslıhat depýtaty retinde arnaıy shaqyrylǵan osy joldardyń avtory biz de óz pikirimizdi, tilegimizdi aıttyq. Eńbek avtorlary abaıtaný baǵytynda zertteý júrgizip júrgen – Aqjol Qalshabek pen Ázimhan Isabek. Osy arada qazaqtyń «ustazy myqtynyń ustanymy myqty» degen sózi eriksiz eske oralady. Olaı deıtinimiz Aqjol Qalshabek – esimi elge málim abaıtanýshy, ǵalym Mekemtas Myrzahmetulynyń shákirti. Al Ázimhan Isabektiń ustazy Aqjol Qalshabek. Iаǵnı abaıtanýshy úsh ǵalymnyń arasynda ǵylymı izdenistik turǵyda salıqaly sabaqtastyq, úılesimdi úndestik bar.
«Bul ómir qyzyǵy mahabbatpen,
Kórge kirseń úlgili jaqsy ataqpen.
Arttaǵyǵa sóziń men isiń qalsa,
О́lseń de, ólmegenmen bolasyń teń»,
degen edi uly Abaı. Dana tulǵalardyń murasyn qaıta tiriltýge sep bolǵan bul týyndynyń máni men maǵynasy aıryqsha ekendigi sózsiz. 1000 danamen Astana qalasyndaǵy «Folıant» baspasynan jaryq kórgen kitaptyń muqabasy uly jazýshy Muhtar Áýezov jaryqqa shyǵarǵan «Abaı» jýrnalynyń úlgisimen órnektelgen. Qalyń oqyrman qaýymǵa arnalǵan týyndy kitaphanalarǵa taratylady.
ShYMKENT
