Foto: N.Baıbýlın
Senat Spıkeriniń aıtýynsha, el Prezıdentiniń tapsyrmasy boıynsha múmkindigi shekteýli azamattardy qoldaý jáne kedergisiz orta qurý baǵytynda aýqymdy jumys atqarylyp, berik ınstıtýsıonaldyq negiz qalyptasyp keledi, elimizde erekshe qajettilikteri bar eresekter men balalardyń ortaǵa beıimdelýine, olardyń sapaly bilim men medısınalyq qyzmet alýyna, sportpen shuǵyldanýyna jáne jumyspen qamtylýyna qajetti jaǵdaı jasalyp jatyr.
«Sondaı-aq Parlament Senaty da múgedektigi bar azamattardyń quqyqtaryn qorǵaýdy kúsheıtý jáne turmys sapasyn jaqsartý salasynda tıisti sharalar qabyldap jatyr», degen Máýlen Áshimbaev Palata janynan múmkindigi shekteýli jandarǵa qoldaý kórsetý maqsatymen qurylǵan Inklıýzııa jónindegi keńestiń qyzmetine toqtalyp ótti.
Kezdesý barysynda senatorlar estý, sóıleý, kórý, aýtızm spektri jáne basqa da aýytqýlary bar balalardy oqytýdyń arnaıy jobalarymen jáne mamandandyrylǵan ádistemesimen tanysty. Osy rette ortalyqta ınteraktıvti bólmeler, arnaıy ázirlengen damytýshy jabdyqtary bar sensorlyq-dınamıkalyq zaldar jumys isteıtinin atap ótken jón.
Ortalyq basshylyǵynyń aıtýynsha, qazirgi ýaqytta ortalyqtyń esebinde 200 bala jáne psıhonevrologııalyq patologııasy bar 42 eresek adam bar. Mekemeniń negizgi mindetteriniń biri – balalardyń ózine-ózi kómektesý daǵdylaryn qalyptastyrý jáne olardyń jan-jaqty damýyna yqpal etý. Osyǵan baılanysty estý qabileti buzylysqa ushyraǵan 20-ǵa jýyq adam, odan bólek, múmkindigi shekteýli bala tárbıelep otyrǵan ata-analardyń ózderi ortalyqta aspaz, tárbıeshiniń kómekshisi bolyp eńbek etedi. Bul áleýmettik beıimdelý men damý úshin qolaıly atmosfera qalyptastyrýǵa yqpal etedi.
Ortalyqtyń ujymyn jáne tárbıelenýshilerin Naýryz meıramymen quttyqtaǵan Máýlen Áshimbaev búgingi «19 naýryz Jańarý kúni» – tabıǵattyń jańarýymen qatar tutas Qazaqstan qoǵamynyń jańǵyrýyn da bildiretinin atap ótti.
