Merekelik is-sharaǵa kelýshilerge shekteý joq. Qala qonaqtary men turǵyndary kóńildi merekeniń qaq ortasynda bolyp, ulttyq dástúrlerimiz ulyqtalǵan marafondy tikeleı efırde de tamashalaı aldy. Qonaqtardyń qurmetine ánnen shashý shashylyp, ulttyq oıyndar oınatyldy. Sondaı-aq Ulttyq sport kúnimen tuspa-tus kelgen is-sharada qyrandy qolǵa úıretip, tazy baptaǵan ańshy-saıatshylar da atadan mıras bolyp kele jatqan ulttyq ónerimiz týraly bilgenimen bólisti.
Is-sharaǵa Senat jáne Májilis depýtattary, memleket jáne qoǵam qaıratkerleri, zııaly qaýym, óner, mádenıet, ulttyq sport ókilderi jáne erekshe isi men erligimen kózge túsip júrgen otandastarymyz qatysty. Arnaıy qurylǵan Etnoaýmaq, túrli taqyryptaǵy talqylaýlar ótkiziletin dıskýssııa alańy, suhbat jáne ulttyq oıyndar alańy uıymdastyryldy. Máselen, dıskýssııa alańynda túrli sala ókilderi, otandyq etnograf ǵalymdar «Naýryznama», «Ulttyq sezim», «Jańa zamannyń adamy» taqyryptarynda oı-pikirimen bólisip, talqylaýǵa qatysty.
Sonymen birge marafonǵa erlik isimen eldiń esinde qalǵan adamdar keldi. Máselen, Almaty oblysynyń Ile aýdanynda avtobýs apaty kezinde jolaýshylardy aman alyp qalǵan 8-synyp oqýshysy Aqjol Geroı, boranda jolda qalǵan júkti áıelge járdem bergen Ereımentaý aýdandyq Tótenshe jaǵdaılardy joıý bóliminiń qyzmetkeri Amangeldi Doskenov, muz oıylyp, sýǵa túsip ketken 17 jastaǵy elorda turǵynyn qutqaryp qalǵan Mereke Edresov, 1 500-ge jýyq mýzykalyq aspapty jınap, saqtap júrgen qolóner sheberi, mýzykatanýshy Azamat Baqııa, búrkitshi, «Qazaqstan» telearnasynan shyǵatyn jańa «Búrkitshi qyz» telehıkaıasynyń keıipkeri Aısholpan Nurǵaıyp, alyp kúsh ıesi, Gınnes kitabynyń rekordshysy Sergeı Syrýlnıkov pen Almatydaǵy jer silkinisi kezinde operasııa jasaýyn toqtatpaǵan Kardıologııa jáne ishki aýrýlar ǵylymı zertteý ınstıtýtynyń hırýrgi Ahyt Baǵdat tikeleı efırge shyqty. Marafon qatysýshylary budan bólek, Qyzylorda oblysyndaǵy onnan astam etnos ókili turatyn Internasıonal-3 aýylyndaǵy Naýryz toıyna kýá boldy.
Urpaq sabaqtastyǵyn jańǵyrtyp, ulttyq ónerdi ulyqtaýǵa arnalǵan marafonnyń mańyzy – ulttyq oıyndar saıysy, aıtys, kúı tartysy men ulttyq kıimderdiń sán úlgisin kórsetken konserttik baǵdarlama arqyly qazaq halqyna tán ulttyq erekshelikterdi pash etip, bolmysymyzdy tanytýǵa septigin tıgizý.
