Qar kóp jaýǵan jyldary kógildir kóktem ózimen birge birshama qıyndyqty erte keletini bar. Oblys ortalyǵynyń irgesindegi Zastansıonnyı kenti qasat qarǵa meltektep, turǵyndardyń aýlasy tolyp, jaıaý júrginshiniń joly tarylyp qalady. Mundaı jaı ásirese jalǵyzilikti adamdar úshin qıyn. Kenttegi mektep oqýshylary qoly qysqa adamdarǵa kómektesip jatyr. Izgilikke toly jas júrekterdiń sharapatyn kórip jatqandar da az emes.
–Úsh jyldan beri múgedekpin. Balalarym Reseıge kóship ketken, – deıdi kent turǵyny Svetlana Gorst, – keıde kórshilerim de kómek qolyn sozyp jatady. Azyq-túlik ákelip beredi, dári-dármekke de muqtajbyn. Al aýladaǵy qardy tazalaýǵa shamam kelmeıdi. Tazalamaı taǵy bolmaıdy. Kólkigen kóp sý ishke enip ketýi de múmkin. Aýladaǵy qar bir erip, bir qatyp, kók muzǵa aınalyp qaldy. Ne isterimdi bilmeı otyr edim, myna aınalaıyn balalardyń kelip, tazalap jatqanyn kórgende júregim eljirep ketti. Alty aı qys aıazdan tońǵan júrekti qarshadaı balalardyń izgilikke toly júrek lúpili jylytyp jatyr.
Keıýana aıtsa aıtqandaı, ótken jylǵy kóktemde erigen qar sýy úıdiń ishine de enip ketse kerek. Sál eńiste turǵandyqtan jol jıegindegi jylǵalardan syzdyqtap aqqan qyzyl sýdyń aldyn alyp tazalamasa, quldılaı qulap, lap bergeli tur.
– Biz ájeıdiń aýlasyn tazalap berdik, – deıdi №14 mekteptiń oqýshysy Azamat Stal, – jalǵyz osy úıdiń ǵana emes, áli de birneshe úıge kómek kórsetýimiz qajet bolyp tur.
Qala ákimshiliginiń aqparatyna qaraǵanda, kenttegi qar tazalaý qys boıy júrgizilip keledi. Kúni búginge deıin 5 myń tekshe metr qar shyǵarylypty. Kóktem saıyn beınetti belshesinen keshetin kenttiń jerasty sýy kólkip tur. Qar sýynyń birden sińip ketpeıtini de sondyqtan. Mundaı kezde tııanaqty jumys istemeı taǵy bolmaıdy. Úlkenderdiń úlgermeı jatqan isin balalardyń jalǵastyrǵany jarasymdy kórinedi eken.
Kókshetaý
