«Alaıaqtar azamattardy aldap, aqsha jymqyrý maqsatynda ózin Ulttyq banktiń qyzmetkeri retinde tanystyryp júrgenin esterińizge salamyz. Sonymen qatar bul shemada «quqyq qorǵaý nemese arnaıy organdardyń qyzmetkerleri» de aıtylady. «Arnaıy operasııa» nemese tekserý júrgizýdi syltaý etken alaıaqtar is-áreketiniń zańdy ekenin rastaý úshin qońyraý jelisin «arnaıy jáne quqyq qorǵaý organdarynyń, Ulttyq banktiń qyzmetkerlerine» jalǵaıdy, jalǵan qyzmettik kýálikterdi, nusqaýlyqtary bar hattardy, sondaı-aq «qarajatty saqtandyrý» jáne bank aýdarymdaryn júzege asyrý týraly derektemelerdi jiberedi», dep habarlaıdy Ulttyq banktiń baspasóz ortalyǵy.
Mundaı qujattarda, kóbine nesıe qaryzy nemese onyń ótelýi, sondaı-aq qarajat aınalymy týraly egjeı-tegjeıli aqparat bolady. Qosymsha qujattarda Qazaqstan Respýblıkasy memlekettik organdarynyń «ýákiletti tulǵalarynyń» qoly, aty-jóni, móri jáne basqa da rastaıtyn derekter kórsetiledi.
Bank habarlamasynda aıtylǵandaı keı jaǵdaıda alaıaqtar «WhatsApp» messendjerindegi profılderdi buzyp, ony óz múddesi úshin paıdalanady. Mysaly, olar messendjerdi buzý úshin qyzyqty ári sendire biletin utys oıyndary, áleýmettik mańyzy bar taqyryptar týraly saýalnama, daýys berý sııaqty túrli syltaýmen taratylatyn qaýipti siltemeler jiberedi. Habarlamany alǵan adam siltemeni basqan kezde, alaıaqtar «WhatsApp» messendjerindegi profıldi birden ıemdenip alady.
Ári qaraıǵy is-áreket ońaı jalǵasady. Messendjerdi buzǵan alaıaqtar profıl ıesiniń atynan onyń jaqyn týystarynan, tanystarynan, dostarynan nemese áriptesterinen ártúrli syltaýmen qaryzǵa aqsha suraıdy. Qarjyny bank kartasyna nemese úshinshi tulǵalardyń shotyna aýdarýdy surap, jappaı sms-habarlama taratady.
«Bul rette áńgime nemese hat almasý kezinde alaıaqtar bastan-aıaq psıhologııalyq qysym kórsetedi, qońyraý jelisin «Qazaqstan Respýblıkasy memlekettik organdarynyń qyzmetkerlerine» jalǵaıdy, Qylmystyq kodekstiń baptaryna silteme jasaıdy jáne qupııany saqtaý kerektigin eskertedi. Sondaı-aq áńgime kezinde qaskóıler uıaly telefonǵa kelip túsken habarlamalardy ózderine jiberýdi, qaýipti siltemege ótýdi, qandaı da bir qosymshany júkteýdi, messendjerde jańa fýnksııalardy iske qosýdy, parol, PIN-kod nemese basqa da qupııa jáne jeke derekterdi aıtýdy suraıdy», delingen qosymsha baspasóz habarlamasynda.
Sonymen qatar alaıaqtar mobıldi bankıngtiń kómegimen oıdan shyǵarylǵan taýardy satý arqyly, salyq (qyzmet) tóleý nemese bank shotyna shekteý qoıý arqyly aqshany onlaın urlaıdy. Bul habarlamalar «elektrondy tuzaq» bolyp shyǵady jáne aıtylǵan shotqa ótken kezde, mobıldi qosymshadaǵy shottan aqsha urlanady.
Osyǵan baılanysty Ulttyq bank «quqyq qorǵaý organdarynyń (IIM, UQK) qyzmetkerlerinen, Ulttyq bank qyzmetkerlerinen» qońyraý kelip tússe, áńgimelespeý keregin jáne qandaı da bir máseleni retteýge, alaıaqtarǵa qarsy «arnaıy operasııa» júrgizý úshin qandaı da bir ózindik áreket jasamaýǵa keńes beredi. Al alaıaqtardyń tuzaǵyna tap bolǵan jaǵdaıda, Qazaqstan Respýblıkasynyń quqyq qorǵaý organdaryna júginý kerek. Sondaı-aq qosymsha keńes alý úshin 1477 qysqa nómiri arqyly Ulttyq banktiń baılanys ortalyǵyna da habarlasýǵa bolady.
