Minsiz qyzmet erlikpen teń

Shyn máninde qıyn­dyqta qol ushyn berip, adam ómirin saqtap qalýǵa járdemdesý – árbir pendege ortaq. Olaı bolsa kúndegi qyzmeti qaýip­pen betpe-bet keletin polı­seılerdiń ár kúni qajyrly eńbek, kózsiz erlik jasaýdan tura­dy. Astana qalasy Polı­sııa departamentiniń qyz­metkeri Nurlan Baýyr­januly bul sa­laǵa kez­deısoq kelmegen. Onyń aıtýynsha, eki aǵasy da quqyq qorǵaý salasynda eńbek etip, zeınetke shyqqan. Sondyqtan da shyǵar, úıdiń úlkenderi salyp ketken sara joldy tańdaýǵa eshteńe kedergi bolmaǵan. Kerisinshe armanyna asyq, maqsatyna beriktigi de ózi qalaǵan salaǵa adastyrmaı jol tabýǵa kómekteskenin aıtqan ol: «Shyǵys Qazaqstan oblysynda dúnıege keldim. Týǵan jerimde Shyǵys Qazaqstan oblysy memlekettik ýnıversıtetin 2006 jyly bitirip, sol jyly ishki áskerde Otan aldyndaǵy boryshymdy atqarýǵa kettim. Al 2014 jyldan bastap quqyq qorǵaý salasynda qyzmet etip, ózim tańdaǵan jolda ter tógip kelemin», dep aǵynan jaryldy.

Búginde kúndelikti patrýlde ártúrli oqıǵalarmen betpe-bet keletin polıseıdiń adamdardy tilsiz jaýdan qorǵap qalatyn sátteri de jıi bolady eken. Alaıda «Bul – erlik emes, meniń mindetim», deıdi Nurlan. Qyzmet barysynda adamdardyń qatelikke jol berýinen arashalap, ómirin saqtap qalsa, keıde óz ómirine qaýip týdyratyn qaskóıler de kezdes­peı qalmaıdy. Esirtkige eligip, ishimdikke salynǵan turǵyndardy da tártipke shaqyryp, eldiń tynyshtyǵyn saqtaý jolynda eńbek etip jatqan qyzmetkerdiń eptiligi men erligi áriptesterine úlgi etip aıtarlyq.

Oqıǵa byltyr 28 jeltoqsan kúni kúndizgi ýaqytta bolǵan. Ádettegideı qyzmet barysynda qala kóshelerin aralap júrgen patrýldik polıseıler joldyń shetinde qulap jatqan adamdy kórip qalady. Qym-qýyt qala tirshiligindegi qalyń nópirdiń arasyndaǵy árbir adamnyń júris-turysyn jiti qadaǵalap júretin qyzmetkerler bul joly da qarap tura almady. Júregi ustap jerge qulap qalǵan adamǵa birden dáriger shaqyrtyp, aq halattylar jetkenshe alǵashqy medısınalyq kómek kórsetedi. Dárigerler kelgenge deıin polısııa qyzmetkeri kómek kórsetýdi jalǵastyryp, er adamnyń tynys alý joldaryna aýanyń erkin jetýin qamtamasyz etedi. Medısınalyq tájirıbesi bolmasa da bar bilgenin jasap, qoldan kelgen kómegin kórsetken patrýldik polısııa polkiniń ınspektorlary adam ómirin arashalap qalǵanyn batyrlyq dep sanamaıdy. Sol kúni de júregi syr bergen adamdy alǵashqy medısınalyq járdem kóligine shyǵaryp salyp, artynsha ózderine bekitilgen marshrýt boıynsha qyzmet atqarýdy jalǵastyrýǵa baǵyt alady.

Bul oqıǵaǵa da ózgeler «polısııa qyzmetkeriniń bir kúndik jumysyndaǵy oqıǵa» dep baǵa bereri sózsiz. Iá, olardyń ju­mysy solaı. Turǵyndardyń ty­nyshtyǵyn kúzetip, adamdardy qaýip-qaterden aman alyp qalý. Biraq adamnyń ómirine arasha bolý úshin de júrekte ba­tyldyq, jumysqa degen joǵary jaýapkershilik qajet-aq. Osy turǵyda polısııa qyzmetkeri Nurlan Baýyrjanulynyń mol tájirıbesi men óz qyzmetine adaldyǵyn erekshe atap ótýge bolady.