Bıznesti qorǵaý basymdyǵy

«Naýqanshylyqqa salynyp, asyra silteýge múlde bolmaıdy. Eger mundaı oqıǵalar anyqtalsa, arnaıy tekserý júrgiziledi. Tıisti baǵa beriledi. 2019 jyly óz Joldaýymda bızneske zań­syz kedergi keltirý memleket múddesi­ne qarsy baǵyttalǵan qylmys retin­de qarastyrylatynyn aıttym», dedi Prezıdent.

Osyǵan oraı búginde Ádiletti Qa­zaq­stan qurý jolyndaǵy negizgi min­­det­­terdiń biri – bıznesti qorǵaý, kásip­kerlerge barynsha qoldaý kórsetý. Pre­zıdent atap ótkendeı, alaıaq­tar­­dyń taı­rańdaýyna jol be­ril­meýge tıis, alaıda quqyq qor­ǵaý organdary­­nyń jáne tıisti qa­da­ǵalaýshy mekeme­ler­diń áreket­terinen bıznes sýbekti­leri de japa shekpeýi kerek.

Sonyń bir mysaly – jýyrda Jo­ǵarǵy sotta kassasııalyq shaǵym bo­ıynsha azamattyq is qaralyp, bıznes ókiliniń quqyǵy qorǵaldy. Biz­ge berilgen málimetke qaraǵanda, Alma­tyda Qala qurylysyn baqylaý basqarmasy «Alıans-Gaz» JShS avto­gaz quıý stansasyn óz betinshe ruqsat­s­yz salyp alǵan jáne jaýapker óz qarajaty esebinen ony buzýǵa tıis dep sotqa júginedi.

Birinshi satydaǵy sot nysandy ruqsatsyz salynǵan qurylys dep taný talaptary boıynsha is júr­gizýdi toqtatqan, óıtkeni zańda mun­daı maz­mundaǵy talapty qaraý kóz­delmegen. Biraq jaýapkerdiń óz qara­jaty ese­binen nysandy buzýǵa tıis degen talapty qanaǵattandyrǵan. О́ıt­keni seriktestik Azamattyq kodekstiń 244-baby 1-tarmaǵyna sáıkes ruqsat etilmegen qurylysqa qatysty ǵıma­rat qurylysynyń zańdylyǵyn rastaıtyn dáleldemelerdi usynbaǵa­nyn negizge alǵan. Sonymen qatar sot talap qoıýshyǵa jáne Qalalyq jos­par­laý jáne ýrbanıstıka basqar­ma­sy­na qatysty memlekettik sáýlet-qurylys baqylaý salasynda ózderi­ne júktelgen fýnksııalardy tıisin­she oryndamaýyna baılanysty jeke uıǵarym shyǵarǵan.

Apellıasııalyq satydaǵy sot bul qorytyndylarmen jáne qabyldanǵan sot sheshimderimen kelisken. Alaıda Joǵarǵy sot atalǵan sheshimderdiń kúshin joıyp, jańa sheshim shyǵardy. Osylaısha «Alıans-Gaz» JShS-nyń ótinishhaty qanaǵattandyryldy.

Keńirek aıta ketsek, kassasııa­lyq satydaǵy sot myna jaıttardy nazarǵa aldy. Bul JShS 2016 jyl­ǵy 9 jeltoqsandaǵy satyp alý-satý sharty negizinde janarmaı quıý stan­sasynyń ıesi bolyp sanalady. Qala qurylysyn baqylaý basqarmasy tara­pynan 2019 jyldyń qyrkúıeginde júrgizilgen tekserý barysynda JShS qoldanystaǵy janar-jaǵarmaı quıý stansasynyń ǵımaratynda qaıta jón­deý jumystaryn júrgizgeni anyq­talǵan. Alaıda baqylaýshy organ ruqsat etilmegen qurylys retinde ǵımaratty túgeldeı sot arqyly buzý­dy talap etken. Biraq úı-jaılar bulaı buzýǵa jatpaıdy, sebebi JShS-ta quqyq belgileıtin qujattar bar.

Seriktestikke 600 myń teńgeden astam aıyppul túrindegi ákimshilik jaýapkershilik belgilendi. О́ıtkeni birinshiden, avtogaz úshin sısternany rekonstrýksııalaý úshin qurylys-montajdaý jumystarynyń (QMJ) bastalǵany týraly habarlamasyz jáne sharýashylyq júrgizý quqyǵy­men jobalyq-smetalyq qujattama­syz ja­nar-jaǵarmaı quıý stansasy­nyń tur­ǵyn emes úı-jaılarynda QMJ júr­gizgen. Ekinshiden, buzý­shy­lyq­tardy joıý týraly uıǵarymdy ýaqytyly oryndamaǵan.

Osy isti qaraý kezinde tóraǵa­lyq etýshi N.Sháripov bul serik­testik atal­ǵan jer teliminiń ıesi ekenin atap ótti. 1999 jyl­dan beri jumys istep turǵan ja­nar-jaǵarmaı quıý beketi óz sheginen shyq­paǵan. Menshik ıesiniń quqyǵyn eshkim joımaǵan.