Atalǵan joba iske qosylǵan sátten bastap Antıkordyń usynymdarymen 600-den astam problemalyq keıs sheshilip, 30 myńǵa jýyq kásipkerge kómek kórsetildi. Júıeli kedergilerdi joıýǵa erekshe nazar aýdarylyp keledi. Olardyń basym bóligi jer qatynastary, salyq salý, memlekettik satyp alý jáne ınfraqurylym nysandaryna qosylý salalarynda anyqtalyp otyr.
Mysaly, Aqtóbe oblysynda «Aqtobe su-energy group» AQ kásipkerlerden elektr qondyrǵylaryn birlesip paıdalanýǵa shart jasasýdy talap etken. Nátıjesinde, 45 kásipker aı saıyn atalǵan monopolıske 50 myń teńgeden (jalpy somasy 2,2 mln teńge) tóleýge mindetti bolǵan. Sonyń esebinen ol óziniń elektr jelilerin jóndegisi kelipti. Talaptardy oryndamaǵan jaǵdaıda elektr energııasyn berýdi toqtatýdy kózdegen. Sybaılas jemqorlyqqa qarsy is-qımyl agenttigi Aqtóbe oblysy boıynsha departamentiniń usynysymen bul negizsiz mindettemeler alynyp tastaldy.
Keı jaǵdaılarda laýazymdy adamdardyń is-áreketteri qylmystyq quqyq buzýshylyqqa ákep soqtyratynyn jáne qylmystyq-quqyqtyq sıpattaǵy sharalar qabyldanatynyn atap ótken jón. Máselen, agenttik bıznesti qorǵaý boıynsha Astana qalasy MKD Janama salyqtardy ákimshilendirý basqarmasy Aýdıt bólimi basshysynyń qylmysyn áshkereledi. Ol 36 mln teńge somasynda qosymsha qun salyǵyn qaıtarý boıynsha oń sheshim qabyldaǵany úshin kásipkerden 3,6 mln teńge para talap etken. Biraq qylmysty júzege asyrý kezinde, ıaǵnı aqshany alǵannan keıin ol ustalyp, sot sanksııasymen qamaýǵa alyndy. Onyń áreketterine qorytyndy baǵany sot beredi.
Budan basqa, sybaılas jemqorlyqqa qarsy qyzmet bıznesti qorǵaý boıynsha qabyldanyp jatqan sharalar aıasynda «Qaztemirtrans» AQ (Qazaqstan temir jolynyń enshiles kásiporny) fılıaldary basshylarynyń zańsyz baıý maqsatyndaǵy jemqorlyq shemasyn ashty. Olar júk vagondarynyń tapshylyǵyn paıdalana otyryp, olardy kedergisiz jáne jedeldetip bergeni úshin kásipkerlerden júıeli negizde para alyp kelipti. Sot úkimimen «Qaztemirtrans» AQ Aqmola jáne Qaraǵandy fılıaldarynyń dırektorlary birneshe ret para alǵany úshin kináli dep tanylyp, 7 jylǵa bas bostandyqtarynan aıyryldy.
Sot úkimi zańdy kúshine engen joq. Bıznesti qorǵaý jumystary jalǵasyp jatyr.
