Kezdesý barysynda álemde teńdesi joq «Uly dala joryǵy» biregeı jobasy jan-jaqty talqylandy. Ulttyq sport qaýymdastyǵynyń qoldaýymen 2024 jyly halyqaralyq deńgeıde ótkizilgeli otyrǵan marafon-báıgeniń uıymdastyrý máseleleri de keńinen sóz boldy. QR Syrtqy ister mınıstrligi óz kezeginde sheteldik dıplomatııalyq ókildiktermen jáne uıymdarmen baılanys ornatýǵa erekshe qoldaý kórsetip jatyr.
B.Turlybekov dıplomatty aldaǵy marafon-báıgege daıyndyq barysynda tyǵyz yntymaqtastyq úshin Ázerbaıjan Respýblıkasynyń at sporty federasııasymen baılanys ornatýǵa yqpal etýge shaqyrdy.
Buǵan jaýap retinde Ázerbaıjan Elshisi At sporty federasııasynyń jobalaryn, sonyń ishinde Ázerbaıjan shabandozdarynyń, sondaı-aq álemdegi eń myqty jylqy tuqymdary, Ázerbaıjannyń ulttyq sımvolyna aınalǵan Qarabaq arǵymaqtarynyń «Uly dala joryǵy» marafon-báıgesine qatysýyna yqpal jasaıtynyn jetkizdi.
Bıyl «Uly dala joryǵy» halyqaralyq dúbirli dodasynyń Botaı (SQO) - Bozoq (Astana) jańa baǵyty tańdalyp alyndy. Kem degende 15 sheteldik komanda qatysady dep kútilip otyrǵan bıylǵy marafon-báıgeniń qashyqtyǵy 500 shaqyrymdy quraıdy.
Marafon-báıgeniń Botaıdan bastalýynyń máni tereń – adam balasy jylqy malyn dál osy jerde alǵash ret qolǵa úıretken, ol ǵylymı dáleldengen. Al VIII–X ǵǵ. kóne túrkilerdiń kıeli mekeni bolǵan Astana mańyndaǵy Bozoq qalashyǵy - jarystyń aıaqtalý núktesi.
«Uly dala joryǵy» – jylqynyń eń myqty tuqymy anyqtalatyn dalalyq laboratorııa.
